Corpus Van Reenen-Mulder (CRM14): Oorkonde I587r35501

Allen den ghenen die desen brief zullen zien of horen lesen . wi pieter hoec prochipape te dumburgh / pieter van criekepit / ende pieter die costere van den cloost_e / Maken cond ende kenlic dat ioncfrouwe aechte he_e iane suster van coudorpe daer god die ziele of hebben moete / eene capelrie makede in der eeren gods te sente piet_s jn middelburgh te v_diene . welke capelrie ioncfrouwe aechte vors_ ghaf eenen ghoeden priester die ghehaten @ was he_e ian van vterecht die men hiet van der crocht / . daer zoe rechte ghifstrigghe of was also langhe als zoe leuede / ende na ioncfrouwe aechten doot zo soude dese vors_ capelrie comen te gheuene an den abt van middelburgh zo wie hi ware sonder eenich versoec van enighen arfnamen . Ende dit zo hebben wi joncfrouwe aechten vors_ menighe waruen ende dicken horen segghen binnen haren ghesonden liue . ende daer vp zo bleef zoe / ende helt vaste ende ghestade toe hare doot toe / als dat die abt van middelb_ rechte ghiftere van der vors_ capelrie ware ende niement / + . + anders Jn orkonden ende in kennessen ter warheiden zo hebben wi pieter hoec prochipape / ende pieter die costere vornoemt desen brief beseghelt met onsen zeghelen . Ende o_me~dat ic pieter van criekenpit vors_ negheene zeghel en hebbe zo hebbic ghebeden Coline beudins zone dat hi desen brief beseghelt heeft / met sinen zeghele vor mi . Dit was ghedaen jnt iaer ons h_en . M˚ . + CCC˚ . + viue ende vichtich des sondaghes na sente lucas dach ewangeliste jn october . -