Corpus Van Reenen-Mulder (CRM14): Oorkonde I587r36303

Wi woyte pieters sone . pauwels domaes sone ende willem ian willems sons sone scepene_ in middelburgh orkonden ende kennen dat vor ons quam gillis dankaerds sone ende machtich vor gheeronc sinen broeder ende vor ziere zuster ende vor ziere zuster kind_en ende scaut quite alle calengieringhe ende alle recht ende an~tale die hi hadde jof hebben mochte an alsulc goet als die abt van onser vrouwen cloestere in middelburgh ghecocht heuet / jeghens diederic floreyns sone nemmermeer tot ghenen daghen an dat vorseide goet te sprekene met enighen rechte jn kennessen deser waerheiden hebben wi woyte . pauwels . ende willem scepenen in middelburgh vorscreuen desen brief bezeghelt met onsen zeghelen vuthanghende Dit was ghedaen jnt jaer ons h_en M ccc˚ drie ende tsestich des maendaghes na onser vrouwen dach assu_ptio