Corpus Van Reenen-Mulder (CRM14): Oorkonde I640r30701

Wi philip van Axle ruddre . Clais willems sone . micghiel detgher . Arnoud gielewents sone . beudin mett_scare martin ser hughes sone . maken cont allen den + ghenen die dese lettren sullen sien . ende horen lesen . dat quam vor ons gillijs joncvrouwe adelicen sone van der triest . Clarine . ende machtild sine sustre . alard . soete . ende katerine marien sire sust_ kindre . met wille_me daniels sone haren voech droeghen vp wettelike pietre Clinkersporen al tlant dat si hadden ligghende in die prochye van Axle jn der byloken parric in wetteliken Cope . en_ si bekenden vor ons dat hem dit vorseide lant wel . ende wettelike es vergolden . ende pieter vorseit heft vp~ghedreghen vor ons dit vorseide lant der kerkwardighen van der byloken . ter karken behoef van der byloken vorseit . vort hebben si belouet . gielijs . en_ alle dandre vorseit . met haren voech . desen Coep the + houdene vaste . en_ ghestade ewelike vp al haer goet waer dat gheleghen si . wel ende wettelike . Ende omme~dat wi willen dat dese dinghe vast bliuen . ende ghestade . hebben wi bi beden van den partien . ghezeghelt dese lettren met onsen zeghelen vthanghende . jn tjaer ons heren als men scrieft . Dusent Drie + hondert . + Ende + seuene . sondaghes . na sente lavrens dach .