Corpus Van Reenen-Mulder (CRM14): Oorkonde I640r31002

Het si kenlec allen den ghenen die nu zijn En_ hier na wesen zullen dat wi zuster marie gheheten abedesse van der byloken Ende couent van der seluer stede hebben ghegheuen En_ ghewisselt ewelike omme de nutscepe van onsen huus~meester justase scaerlakene die heruachtechede daer boydin van den scake vp woende de~welke es gheleghen tuschen iacops honts huus En_ willems huus was van aerteuelde also verre als wi + se houdende waren / Omme drie ghemete lants En_ een alf ligghende in zaemslacht bi sente marien huus binnen onsen lande die~welke waren sijn proper Die twe ghemete heten in moenins hofstede Terde ghemet in zuut~winkle Ende talf ghemet in maersoeten meet Ende voert so heuet ghegheuen die voerseide meester justaes in aelmoesenen En_ tsinen iaerghetide aeruelike der byloken drie ghemete lants ligghende in gherondse in die manire die hier na volghet dit es te verstane dat hi sal hebben elcs iaers te sente bamesse van dier voerseider byloken also langhe als hi leuet zesse En_ dertech scelghe sulker paye als gaen sal tote ghent telken termne voerseit / En_ na sijn doet zullen die voerseide zesse En_ dertech scelghe bliuen te sinen iaerghetide in die byloke voerseit / in deser manieren dat couent sal hebben vp den dach van sinen iaerghetide zestien scelghe / die spetael vijftien scelghe / Die papen Ende die costere vijf scelghe te petantien jn dien dat die voerseide papen segghen vighelien En_ messe Ende waer dat sake dat sijs niet ne daden so wille die voerseide meest_ justaes dat vijf scelghe hebbe die spetael Ende omme~dat wi abedesse En_ couent voerseit / En_ ic meester iustaes voerseit willen dat dese voerseide dinghe bliue_ goet vast En_ ghestade so hebben wi dese lettren gheseghelt met onsen zeghelen huuthanghende Dit was ghedaen int iaer van gratien als men screef dertien + hondert Ende tiene woensdaghes voer alf meie -