Corpus Van Reenen-Mulder (CRM14): Oorkonde I640r31201

Het si cont ende kenlijc allen den ghenen die dese lettren zullen sien en_ horen lesen Dat ic iacop saer arnouds ver mabelien sone En_ marie mijn wijf met haren wettelike_ voghet hebben vercocht der abedessen en_ den couente van der byloken wel en_ wettelike vijf ghemete en_ een vierendeel lands ligghende in die prochie van willemskerke Daer of so ligghen drie ghemete tuschen kindelant en_ darincmeet En_ tuee ghemete en_ een vierendeel in die vijdeuene an die noert~side van der teghelrien omme ene summe van ghelde die ons wel en_ wettelike ver~golden es En_ dit voerseide lant so hebbe_ wi iacop en_ marie voerseit weder ghe~nome_ tenen aerueliken tsense van dier voerseider abedessen en_ van hare_ couente voerseit omme drie pont tsiaers oude parisise te penninghe of die waerde daer na in anderen paymente te gheldene elkes iaers te alf maerte dier voerseider abedessen en_ haren couente te tueen iaerghetide_ tsaer jurdaen rijms En_ ioncvrouwe magriete_ sijns wijfs was Ende ware oec dat sake dat die een pacht den anderen achter~volghede so mochte die voerseide abedesse en_ haer couent haer ande slaen an dat voersiede lant als an haer heghijn goet en_ doen daer mede hare_ vrien wille sonder me toe te doene En_ ware oec dat sake dat hiet ghebrake an dit voerseide lant so ghelouen wi iacop en_ marie voerseit ouer ons en_ ouer ons ore dier voerseider abedessen en_ hare couente dese voerseide rente altoes te voldoene Ende o_me~dat wi willen dat dese dinghe bliue_ hewelike goet vast en_ ghestade so hebbe ic iacop ou_ mi en_ ouer mijn wijf / Ende wi abedesse ouer ons en_ ouer onse couent an dese lettre_ gheanghen onse zeghele in orco_scepen ende in vastheden der waerheden En_ voert so bidden wi Den h_e hughen prochipape in willemskerke Ende jacop zielaerde Dat si an dese lettren anghen hare zeghele jn kenlijcheden ende in vastheden van al desen dinghen voerseit / Ende wi h_e hughe . h_e pieter . lauerens En_ jacop voerseit bi beden en_ bi versouke van beden paertien hebben an dese ieghe_wordighe lettren gheanghen onse zeghele met der abedessen Ende iacops zeghelen voersiet / Ouer dese voerseide dinghe so ware_ als orconden / Euerard van der milmen . bloc zouout . hugh die hemel / pieter brecht jan ians costers sone En_ vele goeder ander liede / Dit was ghedaen int iaer van gracien ons here_ als me_ screef Dertiene + hondert ende twaelfue dinxendaghes na sente niclaeus dach -