Corpus Van Reenen-Mulder (CRM14): Oorkonde I640r32701

Het si cont ende kenlijc allen den ghenen die dese lettren zullen zien / ofte hoeren lesen / Dat jc hughe jacops sone ghesont van lechamen / ende wel bedocht van minen vijf sinnen gheue in puerre aelmoessenen ou_ mine ziele / ende ou_ mijns vader / ende miere moeder ziele / Der kerken ende den hospitale van der biloken hachte ende twintech ghemeite / ende een half / ende hondert roeden lants / lettel min ofte lettel mee / eeruelike / ende Ewelike te hebbene ende te besittene na mijn lijf ligghende in die prochye van zaemslacht / van adendijc ende van axele in diuersen steden / Dat es te wetene / vijf ghemeite ende een half met den dike / lettel min ofte mee ligghende bi der hiden / daer heinric diederix sone nu vp es + in pachte / vijf vierendeel ligghende in den padden~poel bi der biloken lande / Een ghemet ligghende bi noids volres / dat ic cochte ieghen piet_ jans sone / Twee ghemeite viere roeden ende een halue min / dat ghecocht was ieghen heyne calays zust_e / viere ghemette ende een alf vierendeel lettel min / ofte mee / ligghende bi jans gheraerds soens kind_e die ic cochte ieghen janne den grutere / Drie vierendeel ligghende an der biloken lant / die ghecocht waren ieghen Pietre croke / Die heelft van zesd + alf vierendeelen lants die ghecocht waren ieghen heinricke bouffele / Twee ghemeite / ende dertich roeden die ghecocht waren ieghen katerinen bouds elewouds soens wedewe / ligghende an jan willems soens lant / Ende bachten katerinen huse een ghemet daer coppijn cortvrient nv vp woent / Drie vierendeel die ghecocht waren ieghen elewoude jans temmermans sone / daer hi zelue nu vp es in pachte / Drie ghemeite ende dertiene roede_ die ghecocht waren ieghen janne den temmerman daer hi nu vp es in pachte / Twee ghemeite / ende neghentiene roeden die ghecocht waren ieghen firine den temmerman daer hi nu vp es in pachte / Ander half ghemet die ghecocht waren ieghen bouden den temmerman daer hi nu vp es in pachte / Ende twee ghemeite die ghecocht waren ieghen arnoude den mort / ligghende in west~dorpe / vp den tiende pit west~waert an / Ende dat in deser manieren also als hier na volghet / Dat es te wetene dat Couent sal hebben ewelike elkes jaers vp den dach van minen jaerghetide dertich scellinghe parisise te petancien van der rente die comen sal van desen vorseiden lande / Die zieke in den hospitael / viue ende twintech scellinghe parisise / Die priesters / ende die cleerke / viue scellinghe parisise tsiaers / Ende daer bi zullen si zinghen elkes jaers ewelike ou_ mine ziele / ende ou_ mijns vader / ende miere moeder ziele eene zielmesse / ende tsauonts te~voren vighelien / / Ende ware oec dat sake dat sijs niet ne daden so willic dat die vorseide viue scellinghe hebben die zieke in den hospitael met den viue ende twintech scellinghen vorseit / Ende omme~dat ic hughe jacops sone vorseit wille ende begare dat alle dese vorseide dinghe bliuen Ewelike goet / vast / ende ghestade / ende wel ghehouden / soe bidde jc Eenen edelen heere / ende eenen waerden / minen heere van axele / Den heere boydine prochypape van boesten~bliden / Den here woutren prochypape van adendijc / Den heere janne prochypape van zaemslacht / Ende den here heinricke den neue capellaen in zaemslacht / dat si an dese lettren hanghen hare zeghele in orconscepe_ ende in vastheden der waerheden / Ende wi Philips heere van axele / boydijn / woutre / ende jan / prochypapen / Ende heinric capellaen vorseit / bi beiden ende bi versouke hughes vorseit / hebben an desen ieghenwordighe lettren gheanghen onse zeghele wtanghende in kennessen van waerheiden / Dit was ghedaen / jnt jaer ons heeren als men screef dusentech . + drie + hondert . + ende zeuene ende twintech tsaterdaghes na Meye~dach /