Corpus Van Reenen-Mulder (CRM14): Oorkonde I640r33101

Het si cont ende kenliic allen den ghenen die dese lettre_ zullen zieen of horen lesen Dat jc joncvrouwe alene miins here heinric bofels docht_ met minen wetteliken voghet gosine van der hoyen hebbe vercocht hughen jacobs zoene twe ghemete ende achte roeden lants lighende in die prochye van adendiic dat es te + wetene in grote~coppiic voer die houde sluus vp den vliet om ene somme van ghelde die~welke somme hughe voerseid . mi wel ende redelike vergholden heuet ende jc joncvrouwe alene met minen wetteliken voghet gosine voerseid hebbe mi ontharuet van desen voerseiden lande ende hughen voerseid daer in + gheharuet met alme ende met stro na costume ende husaze van den lande . ende hebbe belouet ende beloue hughen voerseid vp dit voerseide lant scadeloes te houdene ende den ghenen die na hem comen zullen ouer mi ende ou_ die ghene die na hem comen zullen ten eweliken daghen Ende om~dat alle dese voerseide dinche zullen bliue_ goet vast zeker ende ghestade ende wel ghehoude so hebbic joncvrouwe alene met mine_ wetteliken voghet gosine voerseid dese lettren ghezeghelt met minen properen zeghele vtehanchende ende hebbe ghebeden narestelike gosine van der hoyen dat hi zinen zeghel hanche an dese jeghenwordeghe lettre_ ende om die bede ende om tforsouc van alenen mine_ wetteliken wiue so hebbic gosiin voerseid dese lettren ghezeghelt met~gaders den haren in kenliicheden ende in meerre vastheden van wareden Djt was ghedaen jnt jaer van gracien als men screef dusentich drie + hondert ende en + en + dertich donresdaghes na sente vinsensus dach - -