Corpus Van Reenen-Mulder (CRM14): Oorkonde I640r33201

Het si cont en_ kenliic allen den ghenen die dese lettre_ zullen zieen of horen lesen Dat jc huge jacobs zoene sette en_ gheue drie pont parisise te minen jaerghetide mede te doene in die byloke en_ dese voerseide drie pont paris_ besettich ende bewise vp viere ghemete en_ vieertich roeden lants lighende in die prochye van zaems_ dat es te + wetene bachte_ boudiin cleens bezuden der straten vp yema_ liebaerts hofstede te doene ouer Mine ziele en_ Miins vader en_ Miere moder en_ Mire vorders in deser manieren te doene vp zente lieuiins dach met dertich scelen paris_ onder tcouent . ende in spelmaent vp onser vrouwen dach met twalef scelen paris_ in den hospitael onder die zieke en_ vp zente m_tiins dach in den wint_ met dertiene scelen paris_ in den voerseiden hospitael En_ vp den zeluen dach met viue scele_ paris_ onder die pape Ende om~dat alle dese voers_ dinche zullen bliue_ goet vast zeker en_ ghestade so hebbic huge voers_ ghebeden narestelike goeden waerden lieden mire vrouwen der abedessen van der byloken der lieuine van der lelien ende der jan monde dat si hare zeghele hanche an dese lettre in kenliicheden van wareden Ende om die bede en_ om tforsouc van hugen voers_ so hebben wi Magriete abedesse . lieuiin ende jan voerseid dese lettren ghezeghelt met onsen zeghelen vte~hanchende in orconscepe van wareden Dit was ghedaen jnt jaer ons heren als men sceef dusentich drie + hondert en_ twe + en + dertich sat_daghes na ons_ vrouwen dach in spelmaent