Corpus Van Reenen-Mulder (CRM14): Oorkonde I640r33304

Het si cont en_ kenliic allen den ghenen die dese lettre_ zullen zieen of horen lesen Dat ver + marie dappers jan dappers wiif met voghede heuet ghecocht jeghen bertolomeuse daniels zoene . twintich scele parisize ewelike staende enen grote_ tornoysen ou_ twalef pene of die waerde in andre_ paymenten daer na volghende om ene somme van ghelde van d_ welker somme hem b_tolomeus voerseid wel houdet vergholden en_ ghepaiit . vp zeuen vierendeel lants lighende in die prochye van adendiic in grote coppiic dat es te + wetene ten hoestende van sente piet_s lande neuens mire vrouwe_ lant van morsele dat men heet zonnemare vp die westzide drie vierendeel ende boesten daer an een ghemet lighende neue_s mire vrouwe_ lant va_ morsele Ende dese voers_ twintich scele paris_ moet b_tolomeus voers_ ghelden of die ghene die dit voers_ lant houdende es elkes jaers . ewelike ghedurende te kersauonde ofte onbegrepen tinghaende van meye daer naest comende ver + marien voers_ of den brinchere van deser lettre_ en_ also van jare te jare Ende waer dat zake dat b_tolomeus voers_ of die ghene die dit voers_ lant houdende ware niet en gholde dese voers_ twintich scele paris_ elkes jaers ten voers_ daghen so mach ver + marie voers_ of die brinchere va_ deser lettre_ zine hande slaen an dit voers_ lant notent en_ plotent copent en_ vercopent gheliic hare heyghere harvachticheden zonder hiemene te verbiedene of te wederzeghene en_ met al der vromen die men vonde vp dit voers_ lant Voert heuet ver + marie voers_ ghecocht jeghen janne den coytere twintich scele parisize elkes jaers ewelike staende ene coninchs grote_ tornoysen ouer twalef pene of die waerde in andren paymenten daer na volghende om ene somme va_ ghelde van der welker somme hem jan voers_ wel houdet ghepaiit en_ vergholden vp ander + half ghemet lants lighende in die prochye van adendiic dat es te + wetene in grote coppiic bachten boudiin machiis zoens en_ die st_te bezuden an der byloken lant vieerd + alf vierendeel lants en_ in adendiic bachten heinric payterix tussce_ wasseliin riims lant of een zide en_ der weduwen lant ser will_m wenemars of ander zide derd + alf vierendeel lants Ende dese voers_ twintich scele paris_ moet jan voers_ ghelden of die ghene die dit voers_ lant houdende es elkes jaers ewelike ghedurende te kersauonde ofte onbegrepen tingaende van meye daer na eerst volghende ver + marien voers_ of den bri_cere van deser lettre_ en_ alfs elkes jaers Ende waer dat zake dat jan voers_ of die ghene die dit voers_ lant houdende ware niet en gholde dese voers_ twintich scele paris_ ten voers_ daghen so mach ver + marie voers_ of die brinchere van deser lettre_ zine hande slaen an dit voers_ lant met al der vromen die men daer vp vonde notent en_ plotent copent en_ vercopent gheliic hare heyghere harvachticheden zonder hiemene te verbiedene ofte wederzeghene Ende om~dat alle dese voers_ dinghe zullen bliue_ goet vast zeker en_ ghestade en_ wel ghehouden so hebben wi ver + marie been zide b_tolomeus en_ jan bander zide ghebede_ narestelike goeden waerden lieden den here wouteren prochypape van adendiic will_m pieters zoene boudiin valken en_ jan den busere dat si hanchen hare zeghele an dese jeghenwordeghe lettre_ in kenliicheden van wareden Ende om die bede en_ om tforsouc van beden paertien voerseid so hebben wi wout_e will_m boudiin en_ jan dese lettre_ ghezeghelt met onsen properen zeghelen vte~hancende in orconscepe van wareden Dit was ghedaen jnt jaer ons heren als men screef dusentich drie + hondert en_ drie ende dertich vp sente jacobs en_ sente kerstofers dach / / /