Corpus Van Reenen-Mulder (CRM14): Oorkonde I741r32401

Wij suster Marie van heerzele bij der gacien van gode abdesse van sente Claren den kloester bij ghent ende Onse ghemeene Couent bij ghoeden voersienlijcken rade en_ Omme tprofijt ende nutscap van onsen kloester vors_ gheuen te kenne ende doen te + wetene allen den ghenen die nv sijn ende hier na wesen zullen dat wij hebben ghegheuen teenen ervelijcken tseense viere buunre ende een half erven den spetale en_ goeshuse van sente jacops huse binnen der stede van ghent Omme veertich schellincghe en_ achte schellincghe al parisise ervelijcker renten eewelijcke ende emmermeer duerende ende die te gheldene ende te + betailne van jare te jare telken halff maerthe den kloester vors_ Costeloes en_ scadeloes Ende dese viere buunre ende een half erven vors_ sijn gheleghen in de prochie van waerschoet vore de poerte van den ghoede van sente jacops huse vors_ Ende wij suster Marie van heerzele ende tghemeene Couent van den kloester vors_ vte versoucke en_ beden van den beleeders van den spetale ende goetshuse vors_ So hebben wij de ervachtichede vorseit ghegheue_ Omme den tseens vors_ Omme de ruste en_ tprofijt va_ Onsen kloester vors_ Ende Omme~dat dese sake en_ voerwaerde zullen bliuen ghoet vaste ghestade en_ wel ghehoude_ So hebben wij suster Marie va_ heerzele en_ tcouent vors_ desen tsaerter ghezeghelt elc met sinen zeghel vte~hancghende / Dit was ghedaen jnt jaer Ons heeren doe men screef . M . + C˚CC . + twintich en_ viere ten in~gane va_ Maerthe -