Corpus Van Reenen-Mulder (CRM14): Oorkonde I741r32402

Wij Pieter proest van + der kerken van sente verilden van Ghent inge in dese sake van spaens haluen van Roeme doen te wetene allen die sijn et wesen sullen dat upt content dat was tusschen der meesterigghen broeders ende zustere van + den gasthuse van ghent ouer de zieke van + den zeluen huus beenside / ende ian van wincle van wondelghem banderside / alse van eere wisselinghen van mersch die ghedaen was tusschen den voerseiden partien de voers_ partien dats te verstane broeder symoen van basseuelde ouer tvoers_ gasthuus ende wouter voere / ende ian ians zuene vten wincle ouer den zeluen ianne vten wincle sinen vader tvoers_ wouters zueer alse naest oer tvoers_ ians vten wincle . waert dat sijns ghebruke keerden dit (onleesbaar) ende discort te ons wart alse inge in dese sake van + den voers_ partien ende beloefden den voerseiden woutere ende dese ian / ians zuene vten wincle / beloefden ouer den voers_ ianne bi heede ende bi sekereden die sij hier up daden dat de voerseide ian goet vast ende ghestade ouden sal al dat bi ons in dese sake sal werden gordineert ende gheseit . Wij om pais ende om ruste van + den voerseiden partien / ende oec in manieren van rechte segghen ende wisen nae al dats voer ons co_men es dat elc van + den voerseiden partien allen daghen eewelike voerwarts ghelden sal de rente ende den cheins die gaet ende sculdech es te gane vter meersch die hi oudende es . voert dat de voerseide woutere ende ian / ians sone vten wincle ouer~Mits dien / dat die van + den gasthuse voers_ ou_ den voers_ ianne vten wincle dicwille vergolden ebben den cheins die vter mersch gaet die hi out mits den voerseiden wissele ouer den voerseiden ianne gheuen zullen der voers_ meesterigghen broeders ende zustere . ij . s_ . Groete tornooyse binnen . ij maenden na den dach van desen letteren ende mits desen zullen de voerseide partien bliuen Ende sijn alse van + der voers_ wisselinghen ende cheinse vortan in paise ende in rusten . Jn orconscepen van wareden van desen sticken soe ebben wij proest voers_ onse zegele gehanghen an dese ieghewordeghe letteren . die waren gegheuen int iaer ons heeren doe men screef . M . + ccc . + ende xxiiii . saterdaechs voer + den ommeganc te dornike