Corpus Van Reenen-Mulder (CRM14): Oorkonde I741r33001

Ane alle de ghene die dese lett_en zullen zien ofte hoeren lesen / Scepenen van der stede van ghent salut met kennessen der waerheden / alse lieuiin van astine procurrerre van sente iacops huus in ghent / heeft wel ende redenlike ghecocht ende ghecreghen shuus bouf voorseid / de herfachtechede / Ende de sticken die hier naer volghen ghescreuen / jnt Eerste ieghen den h_e ianne van der hoyen priester / zeuene ghemete / Ende vier roeden merschen ligghende in de prochie van huesdine die + men heet de naet / welc mersch voermaels was ser clais van loeuelde / die + men haudende es van mijre vrouwen der abdessen van den bossche / jtem ieghen aelbrechte ?isnaghele / Ende ieghen ioncfr_ ghetruden Sijn wijf / ieghen claise van abinsfoerde alse voghet van ioncfr_ ghetruden kindren voerseid / Tgoed dat ser boidins ineden was vp soeldeuuelt / met allen den ghelaghen diere toebehoeren alsoet gheleghen es bi sticken in diuiersen steden / dat + men houdt van den heerscaepen van ayshoue van der weeden / van willemme van der hoyen / Ende van mechiele van den damme / weten alle dat commen es voer ons in propren persoene de voerseide lieuiin van astine / Ende heeft bekent ende verlijt besceedenlike dat hi al dit voerseide goet / land / ende mersch / ende alle de cateyle diere vp Sijn ghecocht ende ghecreghen heeft te sente iacops huuse bouf voernoemt / Ende metten propren ghelde van den seluen huus / Ende heuet al dit voers_ goet vpghedreghen den voerseiden huus / omme daer af te ghebrukene paysinelike allen daghen alse van Sijnen propren goede / Ende o_me~dat alle dese voerseide dinghen zullen bliuen goet vast ende ghestade / En_ wel ghehauden teuweliken daghen so hebben wij dese lett_en bezeghelt metten Seghele van der stede van ghent voerseid / Die waren ghemaect en_ ghegheuen int iaer ons heeren als + men screef / dusentech + / drie + hondert + / Ende dertech / in dertien~hauonde .