Corpus Van Reenen-Mulder (CRM14): Oorkonde I741r35801

Wj boidin de beere houdende de stede van den baliu miere vrouwen van Baren int schependom van Melle_ . houdende oec de stede Bernaerts van den abeele int heerscep dat hem toe~behoerende es . Heinric van der mersch Lieuin hasselman Jan van den pleteche ende Justaes de bruwere schepenen miere voerseider vrouwen van Baren int heerscep van Melle ende oec de schepenen Bernaerts van den abeele voerseit int heerschep dat hem toe~behoert in den tijt dat dese dinghen hier naer ghescreuen ghedaen waren . doen te wetene allen den ghenen die desen jeghenwerdeghen tchaertere sullen sien ofte hoeren lesen dat voer ons es comen in properen persoene bi sinen goeden danke ende vrihen wille Mijn Heere Boidin Rijm riddere ende heeft verkent ende verlijt voer onslieden alse uor wethouders miere vrouwen ende bernaerts voerseit dat hi heeft vercocht wel ende redenleke willemme ser Simoens poerteren in ghent zestiene pont parisise jaerleker ende eeuweleker renten de~wellic Mijn heere Boidin hadde vp de stede ten helsbrouke met allen den ghelaghen der seluer stede toebehoerende . ende up twee ende twintech buunre lants de~welke der seluer stede toebehoeren met allen den vorworden pointen ende verclaringhen die de ghescriften inne hebben ende uerclaren die mijn h_e Boidin van den seluen zestiene ponden parisisen iaerleker ende eeuweleker renten hadde van welken coepe mijn h_e Boidin hem kende te vullen vernought ende al up betaelt met goeden ghereeden ende wel ghetelden ghelde van willemme voerseit . Van welker voerseider iaerleker ende herueleker renten mids versouke van Mijn heere Boidine waren ghedaen drie sondaeghs kercghebode te Melle_ in de kerke naer costume ende vsage uan den voerseiden heerschepen de~welke quamen voer onslieden baliu ende schepenen voerseit onghecallengiert van iemene . ende mijn heere Boidin versochte an onslieden hem wetteleke van desen voerseiden zestien ponden iaerleker ende eeuweleker renten te ontghoedene ende te ontheruene ende willemme der in te ghoedene ende te heruene . Mids welken versouke jc boidin baliu voerseit maende de voerseide schepenen of si kenden dese voerseide zestiene pont parisise herueleker renten comen te kercghebode alsoet voerseit es . ende wi schepenen antwerden ende wijsden met gheuolghe dat an de ghebode gheen ghebrec en ware vp~dat + se Mijn h_e Boidin an hem drought . de~welke mijn h_e Boidin an hem drouch Doe maendic Boidin schepenen voert watter mijn h_e Boidin voert schuldech ware te doene omme hem van der voerseider herueliker renten wettelike te ontheruene . ende wi schepenen wijsden met gheuolghe dat mijn h_e Boidin de voerseide zestien pont parisise iaerleker ende eeuweleker renten met allen den pointen ende verclaringhe_ + die de ghescriften inne hadden die + re mijn h_e Boidin af hadde up soude draghen boidine voerseit in handen als in der heeren stede wesende te skoepers bouf of sgheens bouf die + se schuldech ware te hebbene metten meesten rechte . welken vonnesse mijn h_e Boidin uollechde ende drouch mi Boidin de voerseide eeuweleke rente in handen vulcomenleke naer tfonnesse dat mi schepene_ende hem wijsden . ende jc Boidin maende schepenen voert watter mijn heere Boidin meer toe schuldech ware te doene . ende wi schepenen wijsden naer raet met gheuolghe dat mijn h_e Boidin van den voerseiden zestien ponden eeuweleker renten werpen soude met ochwerpinghen ende hem seluen niet der ane kennen . welken vonnesse Mijn h_e Boidin vollechde vulcomenleke . Ende naer dese voerseide heruelike rente mi Boidine was comen dus wetteleke in handen met allen den maninghen ende w_nessen diere toe behoerden omme mijn h_e Boidine van den voerseiden zestiene ponden parisise wetteleke te ontheruene . ende mids dat hi hem kende te vullen vernought van den coepe van willemme voerseit . ende ic mi kende oec vermoedt van der heeren coepe te vullen maendic boidin schepenen voerseit wat ick + er toe schuldech ware te doene . Ende wi schepenen naer raet wijsden met gheuollecghe dat boidin soude heruen willemmme voerseit alse coepere in dese voerseide zestiene pont parisise iaerleker ende eeuweleker renten alse in siin vri quite coep~goet met allen den pointen ende uerclaringhen die de ghescriften inne hadden ende verclaerden die + re Mijn heere Boidin af hadde voerseit . Ende ic boidin vollechde den vonnesse dat mi schepenen wijsden ende heruede willemme in dese voerseide zestiene ponde parisise iaerleker ende eeuweleker renten alse in sijn vri quite coep~goet sonder eeneghe calaenge metten seluen pointen ende verclaringhen die de ghescriften inne hadden en_ verclaerden die + re mijn h_e Boidin af hadde . ende wi schepenen hier naer ghemaent kenden dat Boidin an al onsen vonnessen wel ende wetteleke gheuollecht hadde sonder eenech verminderen . welke ghescriften die mijn h_e Boudin hadde van desen voerseiden zestiene ponden jaerleker ende eeuweleker renten sijn dese . (onleesbaar) (onleesbaar) (onleesbaar) Ende omme~dat wi baliu ende schepenen bouen gheseit Miere vrouwen van baren ende bernaerts van den abeele voerseit kennen dat alle dese voerseide dinghen tusschen Mijn heere Boidine rime an deene side ende willemme ser simoens an dandere side sijn ghedaen wetteleke ende al wetteleke Ja ende so wetteleke dat si schuldech siin stede te houdene teeuweleken daghen in der voerseider manieren sonder eenech verminderen ofte infringieren so hebben wi in kennessen van eeuweleker waerheden desen ieghenwordeghen tchaertere met~ghaders deen den anderen ghezeghelt elc met sinen properen zegle bi der nerenster bede ende versouke van den voerseiden partien . Dit was ghedaen int Jaer ons heeren als + men screef . M + . CCC + . achte ende vijftech vp Sente denijs dach