Corpus Van Reenen-Mulder (CRM14): Oorkonde I741r36201

Wij jan Coelins Meyere ende wettelic Maenre mijns heeren van masmine jn de prochie van laerne ten tiden dat dese dinghen waren ghedaen Jacop de witte / jan van den Colke ende jan claus scepenen mijns heeren van masmine vors_ in de vorseide prochie ten seluen tiden / doen te wetene ende maken Cont ende kenlic allen den ghenen die desen tsaertre zullen zien ofte horen lesen dat vor ons quamen in propren personen alse vor heere ende vor wet Jan van den voorde ende joncfr_ kateline sijn wetteleke wijf dewelke verkonden ende verlyeden dat sij vercocht hebben wel ende Redenleke heinine pitkine / janne van waes janne den otter / Robbrechte van eeke ende Arende van lueseghem gouuerneerres in desen tijt van den godshuse van der weuers huus in de stede van ghend / viere pond parisise siaers eruelekere ende eewelekere Renten ter armer bouf van den vorseiden godshuse Omme Eene zekere so_me van ghelde daer af dat hem jan van den voorde ende joncfr_ kateline sijn wijf vors_ kenden van den vorseiden gouuerneerres wel betaelt ende al vergolden in goeden ghereeden ende wel ghetelden penninghen / ende scolden + se der af quite ende elken dies quitanche toebehoort teeweleken daghen Te gheldene ende te betaelne de vorseide viere pond paris_ siaers eruelekere ende eewelekere Renten den vorseiden gouuerneerres ende den gouuerneerres die naer hemlieden wesen zullen of den bringhere van desen tsaertre of van der Copien onder zeghel auctentijc ter aermer bouf van den godshuse vornomt elkes jaers in alsulkere munten alse de graue van vlaendre_ sal doen ontfaen jaerlix van siere Renten te sente bamesse ende onbegrepen te alre heleghen messe Emmer naest volghende binnen elken jare vergolden te sine Ende dit hebben jan van den voorde ende joncfr_ kateline sijn wijf vors_ gheassigneert verzekert beset ende bewijst wel ende wetteleke ouer hemlieden ouer haer hoor ende naco_mers den vorseiden gouuerneerres ende den gouuerneerres naer hemlieden wesende ter aermer bouf van den vorseiden godshuse vp zesse dachwand merschs twelke erue es ligghende in tween sticken in veltmersch binnen der prochien van laerne vors_ dewelke men houdt van minen he_e van masmine met twalef scele drie peene paris_ siaers erueleke der vte + gaende sheeren Rente sonder meer Commers Ende droughent den meyere vorseid alse heere wetteleke vp ende in handen ter armer bouf van den vorseiden godshuse in wetteleken pande ende verzekertheden van harer vorseider eruelekere ende eewelekere Renten jn deser Conditien ware dat zake dat in eenich jaer alre heleghen dach ouerlede ende de vorseide Rente niet wel ende al vulco_meleke betaelt en ware in der manieren dat vors_ es / so zullen de vorseide gouuerneerres ende haer naco_mers gouuerneerres sijnde van den vorseiden godshuse / of de bringhere van desen tsaertre of van der Copien onder zeghel auctentijc moghen Co_men vor heere ende vor wet daer de grond van den vorseiden bewise onder ghelehen es ende toghen hare ghebrec / ende dan sullen + se de heere ende de wet vors_ moeten doen ten vorseiden gronde ter armer bouf van den vorseiden godshuse alse tharen propren erue ende goede teeweleken daghen naer Costume ende vsage van den vorseiden heerschepe vors_ Ende ware dat zake dat jemene quame diet sculdich ware te doene binnen tiden ende binnen wilen also hij sculdich ware te co_mene eer sij ten vorseiden gronde ghedaen waren die de vorseide erue daer af loossen wilde / die soude moeten vplegghen ende ghelden de achterstelle van den vorseidere Renten die men tachter ware van verledenen tide / ende daer toe alle de Coste ende scaden die de gouuerneerres van den vorseiden godshuse of de bringhere van desen tsaertre of van der Copien onder zeghel auctentijc hadden of daden bij der fauten dat sij niet vul betaelt en waren van harer Renten ten daghe vorscreuen also verre alse der wet vors_ Redenlic soude dinken behouden emmer tvorseide bewijs pand bliuende van der vorseidere eruelekere ende eewelekere Renten ende desen tsaertre in alle sine pointe bliuende in sine virtuut . . Ende alle dese vorseide dinghen ende elc point sonderlinghe waren ghedaen wel wetteleke ende al wetteleke met drien sondaechs kerkgheboden vp den vorseiden grond van den bewise ghedaen dewelke niemene en Calengierde nochte en wederseide / ende met allen den maninghen ende vonnessen die + re toe + behoorden / ende also men + se sculdich was te doene al naer Recht wet Costume ende vsage van den vorseiden heerschepe / Ende omme~dat wij Meyere ende scepenen bouenghenomt Alle dese vorseide dinghen kennen vor ons ende met ons wel ende wetteleke ghedaen in der vormen vorscreuen / Ende sij moeten sijn ende bliuen goed vaste zeker ghestade ende in te beterre ghedinkenessen bliuen teeweleken daghen behouden altoes sheeren Rechte / so hebben wij desen jeghenwordeghen tsaertre bezeghelt ter beden ende begheerten van partien vors_ in beeden ziden / elkerlic van ons~lieden zonderlinghe met sinen seghele vtehanghende in orconscepen ende kennessen der waerheden . Dit was ghedaen jnt jaer ons heeren / doe + men screef . M + . ccc + . twee ende tsestich vp den andren dach van october . -