Corpus Van Reenen-Mulder (CRM14): Oorkonde K016p37601

Pouwels here van haestrecht om dat mi die goede lude van Scoenhouen van der goude Ende mede die Jn den lande van haestrecht gheseten sijn vervolghet ende ghebeden hebben Soe hebbe ic aenghesien die ghemeene oerbaer des lants van haestrecht ende hebbe hem ghegheuen Een nuwe dijcRecht op der ysele Jn alre Manieren als hier na ghescreuen staet Jn + den Eersten soe sellen si hebben Enen dijcgraue ende vijf hyemraders Des sellen wesen drie te haestrecht ende aen den dijc twee aen die vlist Dese vijf hyemraders mitten dijcgraue voerscreue_ sellen alle Jaer die dijckoeren legghen op sinte Pieters dach in zulle op den dijc tot drien tyden van den Jaer Ende sellen scouwen mit alsulken boeten als die hyemraders wisen dat Recht is van touerste van Minen lande van haestrecht tot stollicker~sluse toe Ende soe wanneer dat die dijcgraue der hyemraders te doen heeft op den dijc soe sel hi + se ombieden tot Eenre seker tijt ende wie dat daer coemt daer sel hi mede scouwen ende Recht doen op den dijc Ende wat die meeste partye wijst sel Recht wesen Mar wie daer niet en quame alsoe dicke als hi niet en quame die verboerde veertich scellynghe hem en lette kenlic scijn dat hi buten lants waer of in heerscaps ghebode of dat hi bedde~vast waer Ende dese boeten sellen hebben die dijcgraue ende die hyemraders voerscr_ Waer dat sake datter enich waer die hier niet en quame daer soude die dijcgraue Enen and_en hyemraet voer nemen Recht mede te doen op die tijt Dien dijc sel + men scouwen twijntich voete breet daer hi scoor is ende sestyen voet breet daer gheen scoor en is Den gawech viertyen voete breet Jn vier vo? na hoech den ouersten kant Ende enen voet buten aen den dijc vier voete breet Die wijt viertyen voete verre van den dijc te wesen Die eerste scouwe sel wesen des sonnendaghes na meye~dach soe sel + men scouwen twee deel aerde van den hoghen dijc den voet volmaect Die hoghe dijc op een boet van acht scellynghen Den voet op vier scellynghe den gawech op vier scellynghe Die ander scouwe sel wesen alle Jaer des sonnendaghes na sinte iacops dach den hoghen dijc sine volle bre?e op Een boet van sestyen scellynghen Den gawech sine volle breede op een boet van vier scellynghe Den voet volmaect op een boet van vier scellynghe Die darde scouwe sel wesen alle Jaer des sonnendaghes na Onser vrouwen dach assumpcio dan sel + men scouwen den dijc ter volre aerde alsoe als die koeren gheleghen sijn ende voerscr_ is op Een boet van sestyen scellynghen ende den gawech ter volre koer op Een boet van vier scellynghe Den voet ter volre koer op een boet van vier scellynghen Dese voerscr_ scouwe en sellen die dijcgraue noch die hyemraet niet verlegghen noch verste_ in gheenre Manieren ende nyet ouer riden den dijc die si bekoeren Mar dien dijc te bestaden ende mannynghe op styeren alsoe veel datter tlant mede bewaert is ende Rechtevoert Jn Een herberghe riden ende alle daghe die mannynghe te scouwen totter tijt toe dat die hyemraet den dijc loeft Dien cost sellen ghelden die ghene die den dijc op sijn lant leyt ende die dijc hoor is van der mannynghe des dijcgrauen ende hyemraders cost voerscr_ die si doen alsoe langhe als si daer op legghen sonder dinctael of wedersegghen nyet meer en moghen si verteren dan horen daghelixen cost dat is die dijcgraue mit sinen Clerc sestyen groot sdaghes Elc hyemraet acht groot sdaghes des mach die ghene die den dijc sijn is betalen binnen daghes licht mit Eenvoudighen ghelde den mannynghe ende den cost van den dijcgraue ende hyemraders voerscr_ doet hijs niet die dijcgraue selt wtlegghen ende heffen weder twiscatte ghelt of vierscatte pande Voert waer dat sake dat daer Een wael scoerde binnen deser voerghenoemder scouwe die soude dat ghemeene lant weder dyken ten vollen dyc Enen voet daer bouen dat binnen der scouwe gheleghen is marghen marghen ghelijc al tlant van haestrecht door Dan sel die dijcgraue metten hyemraet op den wael trecken ende bepalen waer die wael nuttelixte ghedijct is Dan sellen sie stechout coepen ende ruwaer styeren vten lande die op te nemen bi horen eede Ende dat sellen doen drie hyemraders of meer Die ruwaer ende stechout ende alle cost dat den ghemeenen lande toebehoert te ghelden sellen die hyemraders rekeninghe of doen ende bewisinghe den ghemeenen lande marghen marghen ghelijc als voerscr_ is als die wael ghedijct is Voert sellen si mannynghe styeren vten lande den wael mede te dyken wie sijn mannynghe niet en verwaerde daer soude die dijcgraue mannynghe voer winnen Ende wat ghelt dat die dijcgraue wtleyt sel hi twiscatte weder hebben of vier~scatte pande des ghelijx van ruwaer als men die wael ghedijct heeft als voerse_ is soe sellen die hyemraders op~nemen ende daer mannynghe op styeren alsoe veel dattet tlant bewaert is Dan s?l + men dien dijc opleueren den ghenen die hi op sijn lant leyt die sellen an~tasten ende houden dede hijs niet soe sellen die heer an~tasten met den lande ende mit allen lande mit allen goede dat die ghene heeft binnen der scouwe ende binnen den lande van haestrecht die de dijc sijn waer sonder dinctael ende yemants wedersegghen Mar waer dat sake dat die ghene die de wael in hoor dijc scoerde gheen acht marghen lants en hadden binnen der scouwe soe wes datter aen ghebrake soude die here tasten an den naesten eyghen tot acht marghen lants toe Mer wouden die ghene die den naesten eyghen hoor waren moghen den dijc aen~tasten mitten lande voor den here Voert alsoe menyghen dach als men dijct op den wael soe sel hebben die dijcgraue sestyen groot sdaghes mit sinen Clerc voor sinen cost Elc hyemraet acht groot sdaghes voor horen cost dat sel dat ghemeene lant ghelden Ende tot allen tiden mach die dijcgraue metten hyemraet vreese scouwen op den dijc alst hem dvnct dattet noot is Ende desen dijc voerscr_ sel men houden ende nyet te mynren mer te meerren ende te hoghen bi den hyemraet tot des lants oerbaer Ende om~dat ic pouwels here van haestrecht alle dese voerscr_ poynten houden wil ende ghehouden wil hebben voor mi ende Mine nacomelinghe ten eweliken daghen soe hebbe ic dese hantveste beseghelt mit Minen seghel Ende om der meerre vestenysse ende sekerhede wille soe hebbe ic ghebeden Mine lieue ende gheduchte heren als den . . Graue van bloys ende Den here van arkel dese hantveste mede ouer mi te beseghelen Ende wj Jan van chastillon Graue van bloys here van auessnes van scoenhoue_ ende van der goude om bede wille heren pouwels voerscr_ Ende wi Otte here van arkel om bede wille h_en pouwels voerscr_ ende Meenen ende willen dat alle dese voerscr_ poynten witteliken ende wel ghehouden worden ten eweliken daghen Soe hebben wj dese hantveste open beseghelt mit Onsen zeghelen Ghegheuen Jnt Jaer ons heren dusent drie + hondert zes + ende + tseuentich Op Sinte Philips ende sinte Jacops dach Apostels - -