Corpus Van Reenen-Mulder (CRM14): Oorkonde K020p39901

WJ Scepene en_ Raede der Stede van Scoenhou_ Doen Cont Allen Luden Dat wij bij goetdencken en_ consente ons behws Een ordina_tie gheraemt hebben van + den h?se te regi_en daer die beziecte lazerws lude nv met ons jn woenen en_ mede wat recht haer hws en_ woenstat met ons hebben zal / Jn + den eersten dat daer gheen ghesonde lude woenen en zullen dan die den zieken dienen / Voert wat zieke die jnt h?s woenachtich waer en_ Daer storue dat alle zijn tylbaer goede die hij daer jn ghebrocht hadde jof bij hem waren bliuen zouden tot des huus orbaer : Voert zoe wat zieke wtden huse voirscr_ scheyden twaer mit wille of mit voirwaerden Dat die daer nyet meer woenen en zullen : Voert zoe en sal + men daer gheen lude herberghen het en sijn gherechte lazaruse of haer ghewaerde boeden ende die en zullen daer niet langher wesen dan Een nacht of twee ten dede noetzaken van zwaren weder of van beduaster ziechten Voert zoe wanneer men nachtlicht ludet zoe zullen zij ghemeenlijc vallen op haren knyen en_ bidden voer alle die ghene die daer aelmessen toe ghegheuen hebbe_ of hulpe ghedaen jof noch doen zulle_ Voert zoe zullen die ziecke ende haer boeden den huusmeysters onderdaen ende ghehoersam zijn van wat dat zij hem hieten en_ verbieden zullen ende waer Daer yement onghehoers? jn dat zouden die h?smeysters bij wille ende consente des gherechts alsoe corryg_en dats alle die ande_e wel te vreden wesen zullen ?n_ voer? zoe wes m? den beziechten lazarusen maect of bespreect dat men daer recht of doen sal ghelijc men den heylighen gheest of tghasthuus m? ons doet Voert zoe zullen wij van jaer tot jaer twee goede knapen wt onser stede Daer toe voeghen en_ zetten die des huus en_ der zieken orbaer doen zullen . Jn kennysse der waerheyt ende want wij dese voerscr_ pvnten vaste en_ ghestede ghehouden willen hebbe_ soe hebben wij onser stede zeghel aen desen brieue ghehanghen jnt jaer ons he_en Dusent / + Drie + hondert neghen ende tneghentich op Sinte Clemens auond