Corpus Van Reenen-Mulder (CRM14): Oorkonde K020p39902

WJ scepene en_ rade der stede van scoenhouen Doen cont allen luden dat wi bi ghoetdeinken en_ consente ons behw? een ordinancye gheraemt hebben van + den huse te regyeren daer die besiecte lazaruse lude met ons in wonen En_ mede wat recht haer hws en_ en_ woenstat met ons hebben sal . Jn + den eersten dat daer gheen ghesonde lude wonen en sullen : Dan die de_ sieken dienen : Voert wat sieke jnt hws wonachtich waer en_ daer storue : Dat alle siin tylbaer ghoede Die hi daer in ghebrocht hadde jof bi hem waren : bliuen souden tot des hws oerbaer . Voert soe wat sieke wt den huse voerscr_ sceyden twaer met wille of met voerwaerden . Dat die daer niet meer wonen en sullen : Voert soe en sal + men daer gheen lude herberghen het en sijn gherechte lazaruse of haer ghewaerde boden : En_ die en sullen daer niet langher wesen dan een nacht of twee : Ten dede noetsaken van zwaren weder of van beddeuaster siecten . Voert soe wanneer men nachtlicht ludet soe sullen si ghemeenlic vallen op haren knyen en_ bidden voer alle die gheen Die daer aelmissen toe ghegheuen hebben of hulpe ghedaen jof noch doe_ sulle_ Voert soe sullen die sieke of haer boden : Den hwsmeysters onderdaen en_ ghehoersam siin van wat dat si hem hieten of verbieden sullen : En_ waer daer yemant onghehoersam jn Dat souden die hwsmeysters bi wille en_ co_sente des gherechtes alsoe corrigiere_ Dats alle die andere wel te vreden sullen wesen En_ voert soe wes men den beziecten lazarusen maect of bespreect Dat men daer recht of doen sal gheliic men den heilighen gheest en_ den ghasthuus met ons doet : Voert soe sullen wi van iaer te iaer twee ghoede knapen wt onser stede daer toe voeghen en_ setten : Die des huus en_ der sieken oerbaer doen sullen : Jn kennissen der waerheit En_ want wi dese voerscr_ pu_ten vaste en_ ghestade ghehouden willen hebben soe hebben wi onser stede zeghel aen desen brief ghehanghen . Jnt iaer ons h_en Dusent / + Drie + hondert neghe_ en_ tneghentich op sinte clemens auond