Corpus Van Reenen-Mulder (CRM14): Oorkonde K094p31005

Wij tieleman die vriese tonijs haren Ghisebrechts soene Ende Damaes boeneuent scepenen in Dordrecht oerconden ende kennen Dat Clais die ketelare ghehuret heuet jeghens joncvrou vrederaet van alfen Priorinne van den cloester van zenewen Dat Erue daer hi nu vp + woent van der haluer s_ten afterwaerts alse varre alset te rechte ghaet in eenre eeweliker huren hem en_ sine nacomelinghen vrilike en_ vredelike te + besittene om vier pont ghoeder hollansch_ ende twee cappoenen siaers iof in pamente twee zwarte tornoysen ouer eenen penning jof eenen groeten coeninx tornoysen oer acht penninghen jof in andren paymente die waerde daer teghens Die eene helft van deser hure jaerlix te gheuene telken sente bauen daghe En_ die ander + helft telken mey~daghe daer naest comende En_ hier + bi mach dese clays die ketelare sulke timmeringhe alse hi nu heuet vp desen erue jof namaels ghecrighet v_coepen jof verhuren En_ dit Erue mede v_huren Jn sulker huren hijt heuet voert kenne wij voerghenoemde scepenen dat vrederic metten staue ghehuret heuet jeghens dese voerghenoemde priorinne Dat Erue daer dese vrederic nu vp + woent ende gheleghen es jeghens des voerghenoemde clais ketelaers huse recht~ouer van der haluer s_ten ter hauene toe in eenre eeweliker huren met selken voerwaerden alse dese voerseide clais die ketelare sine hure ghemaket heuet en_ voerscreuen es Om vier pont ghoeder holl_ ende twee cappoenen siaers in paymente en_ te tween tiden jaerlix te + betalen alset voerscreuen es jn oerconde desen brieue ghegheuen int jaer ons heeren M ccc en_ tiene des manen~daghes voer vutghaende meye - - -