Corpus Van Reenen-Mulder (CRM14): Oorkonde K094p31006

Wij pieter oudekijn jan die snider En_ willaem ossekijn scepenen in Dordrecht oerconden en_ kennen dat Maes die backer ghehuret heuet jeghens joncvrou vrederaet van alfen der priorinne van den cloester van zenewen Dat erue daer dese maes nu vp + woent van der haluer s_ten afterwaerts alse varre alset te rechte ghaet En_ gheleghen es tusschen meest_ wouter bouwelings ende tusschen lams van maldeghems in eenre eeweliker huren hem en_ sine nacomelinge_ vrilike ende vredelike te besittene om drie pont ghoeder holl_ en_ twee cappoenen siaers jof in payment twee zwarte tornoysen ouer eenen penning jof eenen ghoeden groeten coeninx tornoysen ouer acht penninghe_ jof in andren paymente die waerde daer jeghens Die eene helft van deser huren alle jare te + betalen in sente bauen daghe En_ die ander helft in mey~daghe daer naest comende waert dat men jaerlijcs dese hure niet en betaelde telken termine alset voerscreuen es soe waer dese voerghenoemde hure quite En_ hier bi mach dese maes sulke timmeringhe alse hi nu vp desen Erue heuet jof namaels ghecrighet v_coepen en_ dit Erue mede verhuren jn sulker huren als hijt heuet Jn oerconde desen brieue ghegheuen int iaer ons heeren M ccc en_ tiene des manendaghes voer vutghaende meye