Corpus Van Reenen-Mulder (CRM14): Oorkonde K094p31102

Wij Jan van striene . abel heren gillis sone ende ricout van nordeloes . scepene in dordrecht . Oerconden ende kennen dat voer ons quam . aghate ians wedewe heren alaerds soens daer god die ziele of hebben moete met horen ghecornen mombaer Ende ghelouede te gheuene voer hoer sust_ testament ver zegherade daer god die ziele of hebben moete den heilighen gheest in dordrecht viertien scellinghe holl_ tsiaers staende neghen iaer te betaelne tote elken bamisse daer teerste payment of wesen sal te bamisse die naest coemt voert kenne Om~dat soe oec heeft gheloeft voer ons te gheuene tien scellinghe holl_ tsiaers tote sinte martins tote vtrecht ten ghestichte neghen iaer staende en_ in alre manieren als voerscreuen es als van den viertien scellinghen van den heilighen gheest . Ende dese voerseide rente heeft soe versekert . op haer huis en_ op haer erue dat soe nv ten tiden beseten heeft jn oerconde desen brieue ghegheuen jnt jaer ons heren . + M . + ccc . + Ende Elue des saterdaghes voer sinte ians dach te mid~zomer