Corpus Van Reenen-Mulder (CRM14): Oorkonde K094p32801

Wi ghise dukinc haren willaems soen / ghisebrecht maleghiis haren ghisebrechts soen / ian veren yden soen / en_ coenraed ver neesen soen / Scepenen in dordrecht orkonden en_ kennen dat voer ons quamen pieter jans honts soen En_ willaem reynier / jans honts soen / een clerc / met sinen ghecoren voecht / En_ verghieden dat si vercoft hebben . haren mathise / willaem ballen soens soen / priest_ / alse tote des gasthuus behoef van dordrecht / twee vijftendeel lants / ligghende in den tween dordendelen van den ghehelen were lants dat met heet plaetsweer En_ gheleghen es in den ambochte van tollensen tusscen gherards lande van assche / ende machtelden lande ians honts wedue / En_ hem hier of betaelt es die eerste penninc en_ die leste / hier + bi soe hebben hem pieter ians honts soen voerseit / dat ene vijftendeel / in den heelen dordendeel van den were lants voernoemt / en_ willaem reynier clerc voerseit met sinen ghecoren voecht / dat ander vijftendeel lants / in den anderen dordendeel van den heelen were lants voernoemt / gheloeft te ware_ alse een vri goet van allen commer en_ van alrehande antalen ; in orkonde desen brieue ghegheuen int iaer ons heren M˚ CCC˚ achte en_ twintich op sinte deniis auonde - - -