Corpus Van Reenen-Mulder (CRM14): Oorkonde K094p34101

Allen den ghenen die desen brief sullen sien of horen lesen / Jc broeder Jan Gardiaen der minrebroederie in dordrecht / make kunt met kennessen der wareit dat ic ghesien hebbe eenen brief des scouten ender scepene van dordrecht die ghescreuen es in latine / bezeghelt metter stede grote zeghele / welke brief ? es vten latine in duutsche van worde te worde . als hier na volghelt . Allen den ghenen die desen brief sullen sien / wi scoute ende Scepene van dordrecht maken kunt met desen brieue ende orkunden / dat wi elken ende al ghemeene den weuers wollenre lakene / varwers ende allen den ghenen die eenichgherande wijs van werke antiren dat toten vorseiden ambacht toe~hoert / na dien dat si comen te wonen in + der stede van dordrecht / met personen / ende met haren goede / ende met haren ghesinne / eerst ende meest gheuen alle die vriheit die wi selue ghebruken ewelike durende . Vort gheue wi desen seluen luden dat van dier tijt dat sie comen wonen in dordrecht tien iaer naest comende dat si sullen wesen vri ende bewart van allen vutvarden / bescattinghen / ende beden / ende van alre manire van scattinghen / Ende in allen andren dinghen die hare orbare / toenemen / ende eere / toehoren wil wi + se met geruste vor?etten / noch en sullen + se niet laten worden ghemoyet tonrechte van yemene daer wi + se teghen moghen bescermen . Ghegheuen jnt jaer ons heren dusent tue / + hondert / + ende sesse ende tseuentich / up sente martijn scuddecorf~dach / Ende ? broeder Jan / Gardiaen vorseit / Jn orcunde deser dinghe hebbe desen brief bezeghelt met minen zeghele / Ghegheuen int Jaer ons heren / dusent drie hondert / + ende een ende viertich des dinxendaghes vor sente laurens dach