Corpus Van Reenen-Mulder (CRM14): Oorkonde K094p34501

WJ Rechter ; Scepenen en_ raed . die nv t_ tiit siin en_ gheweest hebben . Ende die porters ghemeenlike der stede van dordr_ . Maken cont . en_ kenlic Allen luden . die desen brief zien zullen jof horen lesen . Dat wi ons ende yghelic van ons . vor ons . en_ vor onse nacomelinghe . Verbonden hebben en_ verbinden ; Ouereenghedraghen siin en_ van onser ghemeenre stede weghen . gheloeft hebben . en_ ghelouen met goeder trouwen ; Waerd dat yemene . van Recht_e . Scepenen en_ rade die nv ter tiit siin . en_ gheweest hebben . of yement van onsen port_en . Enighen last . stoet . jof zwarnesse op quame Roerende van zulker banni_ghe . en_ ghebode . als op jan symons zone van bysanten op meest_ clays stuuc . ende op jacob deysen zone . ghedaen es . Of van enighen saken die noch ghescien mochten . in toecomenden tiden ; die bi den ghemeenen gheselscape van recht_e . scepenen . en_ rade die nv siin en_ gheweest hebben . Ouereenghedraghen waren ofte worden . Dat wi dien . daer of gheheelic en_ al ontheffen zullen . en_ scadeloes houden ende dat helpen draghen . Ende zullen mallic~andren trouweliken daer in te / helpe comen Jn orkonde desen brieue beseghelt metten groten zeghel . Onser ghemeenre stede van dordrecht wthanghende Ende om die meerre zekerheit . Soe hebbe wi jan die verwer . pieter riemmakers sone . Heinric katelinen zone . Tater pieters sone die vleeschouwer ; Aernoud . arnoud ver truden soens zone ; Heine arnouds zone Pieter aechten sone Jan van wiic Vrederic van ameronghen . Didderic h_en Jan v_en yden zoens sone . Gheeraed van orsoyen . Gheeraed hamert lisen sone Berte haren roelofs so_e Ghisebrecht haren ghisebrechts haren jacobs zoens zone . Willaem van essche gilliis zone . Jan reymboud zeebaers zone . Wouter meynen zone . Beudiin beudiin meester zone . Ghisebrecht ghisebrechts zone per totum ? pieters zone . Tielman die vriese haren heinric poppen zone Clawaerd sizariis sone . gheeraed oueracker . ghise scoentop ; Gilliis haren gilliis zone . Willaem van brederode . Daniel van tolleysen . Tielman oem h_en jan oems sone . Willaem camerlinc . Reynoud haren jacobs zone . Gheeraed witte heinric mombaers sone . Pieter sijn broeder Tielman die hont haren florens zone van den zwaerde Liebrecht vaec . Willaem . ? zone . jan van steenberghen . Elewoud willaems zone . en_ jacob boudiins sone . Alle ghemeenlic . / en_ yghelic van ons gheloeft en_ ghelouen vor ons en_ vor onse nacomelinghe . Alle die zaken die hier vorscreuen siin . wel . en_ ghetrouwelike te houden . bi onser trouwe ende zekerhede . ende hebben onze seghelen . jn kennessen . an desen brieue ghehanghen metten zeghel onser ghemeenre stede vorseit wthanghende . Ende waer dat . zake . dat enich zeghel brake . (onleesbaar) of vele an desen brieue . van enighen persoen van ons allen vornoemt . Soe willen wi dat nochtan dese ieghenwordighe brief . vaste en_ ghestade . bliue en_ wel ghehouden . Jn alle sijn macht ende vormen als vorscreuen es . gheliker wijs oft hi wel beseghelt ware . Ghegheuen jnt jaer ons he_en . + M˚ . + CCC˚ . + viue ende viertich viertich