Corpus Van Reenen-Mulder (CRM14): Oorkonde K094p35506

WI abel van bysanten ghisebrechts sone Jan m?ddiin alaerds sone ; Tielman die hont haren florens sone van den zwaerde ende vrederic van ameronghen vrederix sone ; Scepenen jn dordrecht Orconden ende kennen Dat vor ons quam jan lauwen sone wt streuelant ; ende verghiede dat hi vercoft heeft ; Clayse haren heinrix scoutaten sone . Die houder es van desen brieue Tien marghen lands ; gheleghen binnen den ambocht van streeflant ; tusschen kerstinen jan nellen soens weduen lande . an die een zide ; ende den lande dat badeloghe gheeraed jacobs soens wedue . Daer nv ter wilen legghende heeft ; an die ander zide ; Ende hem hier + of betaelt es die eerste penni_c ende die leste ; hier + bi so heeft hi hem Dese tien marghen lands vornoemt ; gheloeft te waren alse een vri goed van allen commer ende van allen antalen ; Ende hier + of zo hebben ; hughe die vryese ; ende jan heinric willaems soens sone . vor ons ghetuucht met horen eede ten heylighen . Dat die rechter . binnen den vorseiden ambochte ouer die ghifte van desen tien marghen lands vorscreuen niet staen en woudde ; Voerd kennen wi . Dat jan lauwen sone vornoemt ; Dese tien marghen lands vorscreuen . weder van den vorseiden Clayse h_en heinrix scoutaten sone jn eenre eeweliker huren ontfaen heeft ; Om Ses pont hollantsche elx jaers ; jn manieren dat jan lauwen sone vors_ . Dit vorscreuen lant . wel verwaren ende vri houden zal alse eyghen lant ; van dikinghe ende van anders allen coste ende oncoste . diere op es . jofte jn eenigher manieren opcomen mach Op ziins zelfs coste ende zorghe ; Onuermindert van den jaerliken pachte vorscreuen ; Dese voernoemde hure . alle jare naest comende te betalen ende binnen der stede van dordrecht te leueren . Op onser vrouwen dach ter lichter ; Daer die eerste betalinghe of wesen zal ; van onser vrouwen daghe ter lichter naest comende ouer een jaer ; jn alsulken paeymente alse bi tiden binnen der stede van dordrecht ghenghe ende ghaue siin zal . Ende waerd dat zake Dat jan lauwen sone vornoemt . Dese tien marghen lands vorscreuen niet wel en verwaerde ; jof dat hi den pacht daer + of jaerlix niet en betaelde ; also ende jn alre manieren alst vorseit es ; So ware die hure vorseit quite ; ende Clays h_en heinrix scoutaten sone vornoemt ; mochte dan . + rechte~vort vrilic sinen wille doen met desen tien marghen lands vorscreuen . alse met anders sinen vri eyghenen goede ; Ende waerd dat an eenich van desen vorwaerden ende gheloeften vorscreuen yet ghebrake ; So es des borghe ; Coenraed badeloghen sone wt streeflant . Dat wel te voldoen als een goed borghe ; Ende hier + of zo heeft ; jan lauwen sone vors_ . Den voernoem? ?rade badeloghen sone ; gheloeft te ontheffen ende scadeloes te houden ; Jn orconde desen brieue ghegheuen jnt ? ons heren . + M˚ . + ccc˚ . + viue ende vijftich ; Des vridaghes na sinte ponciaens dach