Corpus Van Reenen-Mulder (CRM14): Oorkonde K094p36601

Allen luden doe ic willem van dronghelen Ridder / heer van eten ende van Meduwen / Cont ende kenlijc / dat ic verlijt hebbe ende verlye voer mi en_ voer mine nacomelinghen / florijs Claes voechs soen / ende sinen nacomelinghen / tien marghen lants / gheleghen in monster ambocht vp schueringhen / Daer claes die voecht vorscreuen naest ghelandt is met tween marghen lants / die hi houdende is van aernt van + der dussen / ligghende zwtwaert ende gheronc die smit noertwaert / met hoeren hostaden / die daer vore aen gheleghen siin met hoere timmeringhen / ende met allen hoeren toebehoeren / Ende naest den vieren honden lands van + den vorscr_ tien marghen lands / die gheleghen siin alre vterste noertwaert / Soe leghet een marghen lands / die toten vorscr_ tien marghen lants niet en hoert / Ende dese vorscr_ tien marghen lants hebbe ic verlijt florijs vorscr_ hem en_ sinen nacomelinghen / van mi en_ van minen nacomelinghen te houden tot enen Rechten erfleen / En_ te verheerghewaden alsoe dicke ast verschijnt met acht + alf pont swarten / En_ hier ouer waren mine manne / als heinric van dronghelen / florijs die moelneer peters soen / diddric snegaert ende ian voet . jn kennissen en_ in ghetughenissen der waerheit / Soe hebbe ic willem van dronghelen Ridder vorscr_ desen oepen brief bezeghelt met minen zeghele Ghegheuen jnt iaer ons h_en dertien + hondert ses en_ tsestich vpten sesten dach jn merte . . . .