Corpus Van Reenen-Mulder (CRM14): Oorkonde K094p36701

WJ Recht_ . Scepenen . raet . en_ die ghemeene stede van dordr_ doen cont allen luden . dat wi metten goeden luden onsen portren Van den wantsniders ghilde in dordrecht . ouermids kenlike noetzake en_ orbaer der ghemeenre stede En_ om ghebrec dattie stede vortiits jn alrehande beleede ghehadt heeft om te scuwen onraet jn der stede en_ die meeste ruste voert te zetten tot ons rechts lantshe_en behoef en_ die stede vors_ in betren poynten te brenghen van neringhen en_ van rechte . Met mallic~andren ouereenghedraghen siin dat wj in coren gheleit hebben alzulke poynten als hier na ghescreuen staen . Jn den eersten . dat wi hem ghelouen te houden consent_en en_ ghehouden willen hebben . alzulke coren en_ poynten van horen ambocht ende neringhen van ghewande te sniden en_ te hantieren . alssi van~ouds behantuest en_ haerbrocht hebben . jn allen manieren also hore brieue (onleesbaar) die si hebben bezeghelt van den he_e en_ van der stede met alzulken coren als daer op ghemaect siin bi den he_e en_ der stede en_ bi horen ghilde alst haercomen is . Voerd dat nyement wie hi si dese coepmanscep en_ neringhe van ghewant sniden bjnnen dordr_ en sal hantieren hine si port_ en_ hine hebbe tsghilden ghemoede en_ hine hebbe een stal optie halle wt~gheset den vrien jaermarcten van d_ stede optie boete van tien ponden holl_ en_ op siin portrecht . en_ dat nyement jn dit vors_ ghilde ontfaen en worde hine si port_ en_ hine sal selue dese neringhe hantieren van den vorscreuen ghilde stadelic als ander ghewant lude sonder archlist . en_ optie zelue boete . En_ waer dat zake dat den goeden luden van der stede of yemende van den ghilde vorscreuen . ouermids desen zaken enighen stoet . last . of zwarnesse opquame des sulle_ wi troulic bj mallic~andren bliuen . dien onraet te wederstaen . behoudelic altoes onsen lieuen he_e siinre heerlicheit . en_ siins rechts . en_ der stede van dordr_ haers rechts en_ eenen ygheliken siins rechts . Ende om~dat wi dit wel en_ ghetroulic willen hebben ghehouden en_ meenen te houden ; Soe hebben wi onser stede zeghel an desen brieue ghehanghen . Jn vestenessen deser dinghe jnt jaer ons he_en M˚ + . ccc˚ . + zeuen en_ tsestich op Sinte gillijs dach - - -