Corpus Van Reenen-Mulder (CRM14): Oorkonde K094p36702

WJ Rechter ; Scepenen . Raed . ende die ghemeene stede van dordrecht . Doen cont allen luden dat wi met~ghaders des ghemeens ambochts onser poertere_ in dordrecht van dier neringhe die hier na ghescreuen staet ; dats te weten den backers . Om ghemeen noot / orbaer en_ nutsscep en_ om ghebrec dattie stede voortijts in alrande beleede ghehadt heeft . en_ om te scuwen onraed in d_ stede en_ die meeste ruste en_ profijt voert te zetten tot ons gherechts lanthe_en behoef en_ die stede van dordr_ in bet_en poynten van neringhen te bringhen en_ van rechte / Met mal_c~anderen ouer~een~ghedraghen ziin ; dat wi hem gratien hebben ghegheuen en_ in choren gheleit alzulke poynten als hier na ghescreuen staen ; jn + den eersten dat + men hem alle jare op tnyen ghewas van den coerne Een proeue doe / op der stede cost alst haer~comen is van~ouds / bi twee goeden luden wt den gherechte . en_ twee wt den ambochte en_ daer bi rekeni_ghe te doen en_ dan voert / na dien beloepe / al tiaer / van weke ter weken te hoghen en_ te leeghen na den cope / van den coerne bi tiden / Ende gheen voerbroet te backen / ten si gheteykent met vijf steken ; Oec mede dat nyement jn dordr_ en backe hi en si port_ en_ hebbe des ghilden ghemoede / Ende dat + men ghelike weghers zette ; zoe~dat die arm ghemeente eenighe ghelike penni_c waerde hebben moghe . Voert dat nyement jn dit ambocht en wercke . hi en si poerter en_ hebbe des ghilden ghemoede ; Soe wie daer ou_ dede dats op een peyne en_ boete van tyen ponde_ en_ tportrecht voerd dat nyement in dit ghilde vorscreue_ ontfanghen en zal worden / hi en si dese neringhe stadelike hantierende op die zelue boete vorscreuen en_ alle zaken vorscr_ zonder arghelist ; Ende waerd dat der ghemeenre stede jof ons_ eenich om deser zake / last of zwaernesse op~quame des zullen wi trouwelic bi mallic~ande_n bliuen dien onraed te weder~staen / behoudelic altoes onsen lieuen he_e siinre heerlicheit siins rechts en_ der stede van dordr_ haers rechts ; Ende om~dat wi dit wel en_ ghetrouwelic willen hebbe_ ghehouden ende meenen te houden / Soe hebben wi onser stede zeghel van dordrecht aen desen brieue ghehanghen jn vestenesse deser dingghen jnt jaer ons he_en . + M˚ . + ccc˚ . + zeuen en_ tsestich . Op sinte gillijs dach . -