Corpus Van Reenen-Mulder (CRM14): Oorkonde K094p36704

WJ Rechter scepenen ende Raed ende die ghemeene stede van dordr_ Doen cont allen luden dat wi met~ghaders des ghemeenen ambochte_ onser poert_en in dordrecht van dien neringhen die hier na ghescreuen staen Dats te wetene Scherers met der drogher schare en_ baerdemakers die onder een ambocht te~zamen ghenoemt ziin o_me ghemeenen noot orbaer en_ nutsscep . en_ om ghebrec dat die stede vortiits in alrehande beleede ghehadt heeft . Ende o_me te schuwen onraed in der stede En_ die meeste ruste en_ profijt voert te setten . tot ons gherechts lantshe_en behoef en_ die stede van dordr_ in bet_en poynten te bringhen van neringhen en_ van rechte . Met mallic~ande_n ouer~een~ghedraghen siin dat wi hem gratien hebben ghegheuen en_ in coren gheleyt alsulke poynten als hier na ghescr_ staen . Jn den Eersten dat nyement wie hi si . die gheen poort_ noch in hoer ghilde niet en is wercken en mach binnen der stede vriheit van dordr_ . alse meesterye van eenich deser vornoemder ambochten te hantyeren . hi en si poort_ in dordrecht . Ende hine hebbe des ghilden ghemoede daert werc of roert noch oec in knaepscep . hine hadde des ghilden ghemoede daert an roert . so wie daer ouer dede dats op een pene van tyen ponde_ en_ siin portrecht Voerd dat nyement in eenich deser ghilden of ambochten en zal worden ontfanghen . hine si wercman van dien ambochte Ende hi sal dat ambocht stadeliken hantyeren optie zelue vorscreuen pene . Ende alle zaken vorscr_ zonder archlist . Ende waer dat zake dat der ghemeenre stede of onser eenich om dese zake last of zwaernesse op quame des zullen wi trouwelic bi mallic~ande_n bliuen . dien onraed te weder~stane ; behoudelic altoes onsen lieuen he_e siinre heerlicheit siins rechts en_ der stede van dordr_ hoers rechts ; En_ om~dat wi dit wel en_ trouwelic willen hebben ghehouden ende meenen te houden Soe hebben wi onser stede zeghel van dordr_ an desen brieue ghehanghen jn vestenisse deser dinghen . jnt jaer ons he_en M˚ . + ccc˚ zeuen en_ tsestich Op sinte gillijs dach . -