Corpus Van Reenen-Mulder (CRM14): Oorkonde K094p36705

Jn den name ende in der eeren van ons liefs heeren ihesu cristi ; Wi ghiltbroeders ende alle die ghesellen ende werclude ghemeenlic ende bisonder van den wollen weuers en_ volres jn dordrecht Doen cont ende openbaer met kennissen der waerheit (onleesbaar) (onleesbaar) ons / anders alle die gilden in dordr_ ghemeenlic als vleeschouwers / vischcop_s / Sciplude ; houtcopers van sinte nyclays ghilde ; huustymmerlude / Cupers / Scrinemakers dehouwers / Sciptymmerlude / backers / brouwers~slude / ysersmede / wantsniders ; nyen cleedermakers / Oudecleedermakers / Siluersmede / Ryemakers / potgh? / beeldemakers / glasemakers / Maetsenaers / tegheldeckers / nyen schoemakers / Outschoemak_s platinemakers ; Scherers / Ryeddeckers / leemers / hantschoemakers / semakers / taschmakers / zaghers / knapen van den Wiin~ambochte ; Ramers / varwers / wollecop_s bontwerk_s . linnenweuers / appelcop_s / mandemakers en_ moelnaers ; gheloeft te hebben te helpen houden zulke vriheit en_ alsulke koren als tot onsen ambochten behorende siin en_ wi met den rechte van ouden haercomen ghebruuct en_ ghehadt moghen hebben / onuermi_dert / sonder archlist / Dat wi dien zeluen ghilden vornoemt en_ elken van horen ghildebroeder bisonder / gheloeft hebben in goeden trouwen en_ ghelouen met ghesamender + hant en_ elc vor al en_ hebben hem ghesekert ende ghezworen ghetroulic bi te staen en_ bi hem te bliuen / te leuen ende te steruen en_ om nyements wille of te gane noch te bezwiken / jn manieren dat wi altoes ? bliuen zullen bi onsen rechten lantsheer en_ bi onser stede~recht van dordrecht / na allen den inhouden van der stede hantuesten die si nv heeft iofte namaels vercrighen ? als goede wittachtighe lude sonder wedersegghen alle archlist ofgheset / Voert dat wi hem zullen helpen houden zulke priuilegien en_ vriheden als hem die stede ghegheuen ende in koren gheleit heeft jn allen mani_en als hoer brieue begripen die si daer + of hebben onder der stede zeghel ; waer oec dat sake dat yement van hem luden / siin hantueste . die hi van der stede heeft verlor of dat si bi ongheual te~broken / of te niete ghemaect worde / zo souden wi na onsen v_moghen daer + toe ghehulpich wesen en_ bereet / hem een ander alsulke hantueste wed_ an die stede te v_weruen beseghelt met d_ stede zeghel / Oec mede zo ghelouen wi hem en_ zekeren / Dat wi met hem en_ ghelike hem / altoes ghehouden zullen bliuen te ghelden allen cost ende oncost dien si bi tiden ten ghilden orbaer ghemeenlic Doen zullen / het si met waken / met heeruaerden met reysen / met schote / met lote en_ met anders in allen zaken die si bi tiden ouer~een~draghen en_ behoeuen (onleesbaar) sonder yet daer jeghens te zegghen of te doene ; Ende want wi hem alle dese poynten vorghenoemt vaste en_ stade meenen te houden / ghetroulic sonder (onleesbaar) tot eeweliken daghen . So hebben wi hem desen brief ghegheuen open beseghelt met ons ghemeens ghilts zeghel jn vestenessen deser zaken . Jnt jaer ons he_en . + M˚ . + ccc˚ . + zeuen en_ tsestich . Des woensdaghes na sinte matheeus dach