Corpus Van Reenen-Mulder (CRM14): Oorkonde K094p36708

WJ Rechter scepenen ende Raed ende die ghemeene stede van dordr_ Doen cont allen luden dat wi met~ghaders den ghemeenen ambochten onser poert_en in dordrecht van dien neringhen die hier na ghescreuen staen Dats te wetene . ziluersmede / ryemakers potghieters beeldemakers ende glasemakers die onder een ambocht te~zamen ghenoemt ziin Omme ghemeenen noot orbaer en_ nutsscap ; Ende om ghebrec dat die stede vortiits in alrehande beleede ghehadt heeft Ende om te scuwen onraedt in der stede . en_ die meeste ruste en_ profiit voert te zetten . tot ons gherechts lantshe_en behoef / en_ die stede van dordr_ in bet_en poynten te brenghen van neringhen en_ van rechte / Met mal_c~anderen ou_~een~ghedraghen ziin . Dat wi hem in gracien hebben ghegheuen en_ in coren gheleyt ; alsulke poynten als hier + na ghescreuen staen jn den eersten dat nyement wie hi si die gheen poerter / noch in hoer ghilde niet en is . werken en mach binnen der stede vriheit van dordr_ . alse meesterye van eenich deser vornoemder ambochten te hantyeren . hi en si poert_ in dordr_ ; Ende hine hebbe des ghilden ghemoede . daert twerc of roert / noch oec in knaepscap . hine hadde des ghilden ghemoede daert an roert . Soe wie daer ouer dede Dats op een pene en_ boete van tyen ponde_ en_ tportrecht Voert dat nyement jn eenich deser ghilden of ambochten en zal worden ontfanghen hine si wercman van dien ambochte . Ende hine zal dat ambocht stadeliken hantyeren op die boete en_ pene also vorscreue_ es Ende alle zaken zonder arghelist . Ende waer dat zake dat der ghemeenre stede of onser eenich om dese zake last of zwaernesse op~quame . Des zullen wi trouwelic bi mallic~ande_n bliuen . die onraet te weder~stane ; behoudelic altoes onsen lieuen he_e siinre heerlicheit / siins rechts en_ der stede van dordrecht hoers rechts . Ende om~dat wi dit wel en_ trouwelic willen hebben ghehouden ende meenen te houden . so hebben wi onser stede zeghel van dordrecht aen desen brieue ghehanghen jn vestenisse deser dinghen . Jnt jaer ons he_en . + M˚ ccc˚ zeuen en_ tsestich op sinte gillijs dach . -