Corpus Van Reenen-Mulder (CRM14): Oorkonde K094p37401

In gods namen amen ; dits die ordinantie en_ die ghemeene eendracht ; der dekenen en_ vinders van den bontwerkers jn dordrecht : jn den eersten so wat ghiltbroeder ; die deene dandren sculdich ware van gherechter scult ; Ende die dat den dekens of den vinders toecht ; dat zullen si berechten ; Roerende van den ambocht vorseit ; Ende hi en zal nyet werken ; hi en heeft voldaen Ende waerd dat die ghene sine daghe van betalinghe die hem gheset worde . nyet en hilde die v_boerde also dicke als hijt dede sonder v_drach een pont was / Voerd so wat man die om siin dach~loen wrochte . die eenen meester sculdich ware van den ambocht of gheloeft hadde te werken . jn dach~hueren of in pennewaerden En_ die meest_ ouer hem claghede . die en zal met nyemende werken . hi en heeft dien meest_ voldaen . optie boete van een pont was ; Ende so wat meest_ dien knape te wercken gaue . hi en hads den meest_ daer hi laetste wrochte gheuraecht of doen vraghen of hem voldae_ ware v_boerde een pont was ; jtem so wat ghiltbroeder die werct poert_s werc . Sal gheuen tghilde van elken honderden enghelscher of hollantscher velle . zes penninghe groete . van een hondert spaenscher velle drie pe_ninghe groete . van een tymmer~lasten twee pe_ninghe groete . van een tymmer~werx eene_ penninc groete . Ende so wat manne die hier of dien ambocht vors_ nyet en voldede eer hijt wrochte En_ daer of betuucht worde v_boert een pont was also dicke als hijt dede ; Ende men zal gheuen van otters van beuers en_ van anders alre wilder peltryen ; van elken stic twee penninghe holl_s . van scaep~velle van snij~tvelle van elken eenen penninc holl_s Ende so wat man die dit v_zakede en_ daer of betuucht worde v_boerde siin ambocht Voerd so wat vreemt man die jnt ambocht nyet bevrijt en is : En_ die (onleesbaar) eenich werc wrochte tot eens poerters huus vorscr_ . die en zal + men nyet te werke zetten En_ waert dat hem yement te werken gaue hi en (onleesbaar) tambocht voldaen die v_boert een pont was : Voerd waer dat zake dat yement een leerkint dat sijns selfs nyet en (onleesbaar) name te leeren . die zal gheuen een pont was ; En_ en waert tkint nyet rijc ghenoech Soe zalt die meest_ zelue daer + voer gheuen ; voerd wat man die ter marghen~sprake of jnt besit des ghilden ontboden worde ; wiere nyet en quame v_boert eene_ groeten ; En_ wie dat dekens of vinders v_sprake of onhoefsche woerde gaue om tsrechts wille van den ghilde ; die v_boerde sonder v_drach also dicke als hi daer + of betuucht worde een pont was ; Voerd so wat twist of ghescyl van woerden jnt ambocht valt En_ der heerlicheyt noch trecht van der stede nyet jeghens ondraecht dat zullen die dekens en_ vinders v_liken en_ wech~brenghen Ende so wie des an hem nyet bliuen en wilde die v_boert een pont was sonder v_drach : Ende elc pont was mach men lossen met zes penninghe groeter ; of met drien dordrechtschen placken ; jn orkonde der warheyt en_ om~dat wi willen dat dit vast en_ ghestade bliue en_ wel ghehouden worde tot eewighen daghen Soe hebben wi desen brief en_ coren open bezeghelt wthanghende Met ons ghemeens ambochts zeghel . Ghegheuen jnt jaer ons he_en . + M˚ . + CCC˚ . + vier en_ tseuentich Opten palmsonnendach . dat was die vijftiende dach der maent van aprille . . -