Corpus Van Reenen-Mulder (CRM14): Oorkonde K094p39901

Wj pieter pieters sone / godscalc h_en gilliis sone . jan h_en martijns sone Ende jan van haerssen heinrix sone Scepenen in dordr_ Orconden ende kennen dat vor ons quam pieter gheemans sone wt gheemans ? Ende verghiede dat hi vercoft heeft scildman jacops sone die houder es van desen brieue een vierendeel van acht marghen en_ vier hont lands gheleghen in zwindrecht in h_en jans ambochte van rosendael met zulken husinghe en_ tymmeringhen als + er nv ter tijt toe behoert en_ jan aernt sone van scoenhout toe te behoeren plaghen in sinen lesten liue tusschen jan jans soens lande optie oest~zide en_ den lande dat willem aernt lycle soens sone daer legghende hadde in sinen lesten liue optie west~zide En_ hem hier of betaelt es die eerste penninc en_ die lesten hier by zo heeft hy hem dit vorscr_ vierendeel van + den acht marghen en_ vier hont lands met alle horen toebehoeren in alle manieren als vorscr_ staet ghelooft te waren als een vry goet van allen commer en_ van allen antalen . hier of hebben vor ons ghetuucht op horen eet pieter vastraets sone en_ aernt gillijs sone als heemraders dat die rechter met anders den heemradre_ ouer die ghifte van desen vorscr_ lande met alle sinen toebehoeren stonden en_ den eyghendom daer of vry kenneden Ende dat die coep daer of al~daer in + den ambochte vors_ int openbaer in + der kercken onder der hoemissen ghecondicht wart des sondaghes na mey~dach nv lest leden Ende waerd dat hier an yet ghebrake zo sijn des borghen willem gheemans sone en_ jan gheemans sone ghebroeders dit wel te voldoen als goede borghen en_ hier of heeft pieter gheemans sone siin vorscr_ borghen ghelooft wel te quiten en_ scadeloes te houden Jn Orconde desen brieue ghegheuen jnt jaer ons he_en M˚ + . ccc˚ . + neghen en_ tneghentich opten derden dach der maent van junio