Corpus Van Reenen-Mulder (CRM14): Oorkonde K094p40001

DIt is alzulke soe_ne en_ segghen als dat alinghe gherecht en_ die achte in dordr_ metten achtien p_sonen die der op die tijt toe gheuoecht en_ gheordineert waren van + der stede weghen vors_ van + der ghemeenten weghen . en_ van jacobs van kuunre En_ tielman baernts soens weghen om ghemeen p_fijt en_ orbaer der stede vors_ . En_ hebben aenghesien den groten last van beyden p_tyen . die tot deser tijt in der stede is . Om die te beuellen en_ alle saken daer of ten besten te keren . En_ om te voerhoeden alle arch datter namaels wt spruten mocht . als van + den ongheual en_ dootslaghen . die ghesciet sijn aen tween eerbaren p_sonen Ghijsbrecht va_ kuu_re ghijsbr_ zoen . En_ wiggher baernts soen dien god ghenadich sy . Eendrachtelic en_ minlic daer of een alinghe vaste zoe_ne gheseit en_ gheordineert hebben . bi consente der ghemeenre neringhe in dordr_ . Ende bi consente alle ghijsbrechts van kuu_re . en_ wiggher baernts soens maghen . Des soe sal jan h_en martijns soen en_ sijn maghen tot ewighen daghen versoende luden wesen van + den dootslaghe en_ ongheual voerscreuen Jn alzulker maniere_ en_ vorwaerden soe hier na ghescr_ staet . Jn + den eersten soe heeft hem jan h_en martijns soen verwilcoert voer scepene_ in dordr_ op sijn lijf ne_m__meer in ghezworen recht te comen in + der stede voers_ als scout borghermeyster scepen raet acht noch deken noch in ghenen dienst die der stede vors_ roert Jte_ heeft ofstal ghedaen van alle den ghenen . die van + den ongheual en_ dootslaghe voerscr_ bezaect sijn of bezaect sulle_ worden . En_ ne_m__meer in dier luden gheselscap te comen noch raet noch daet met hem te hebben in gheenre wijs dat den heer der stede en_ der ghemeente_ of enich van + den vrienden van + der doderhant ieghens draecht Jtem sal buten ons liefs h_en lant van hollant wesen een tormij_ van zeuen jaren lanc naest comende . En_ daren tenden alsoe langhe durende als den heer der stede der ghemeente_ . en_ den vrienden van + der doderhant ghenoecht . En_ hier om niement te misdoen noch doen misdoen in gheenre wijs datten heer der stede d_ ghemeente_ of enich van + den vrienden van + der doderhant ieghens draecht . En_ des soe sijn borghe van jan heren martijns soens maghen . dese voornoemde ponte_ en_ verbanden te houden . en_ te doen houden op hoer lijf . Eerst martijn van + der sluus jacob hont damaes soen hughe feytop die snider en_ heynric dircx soen . Jtem w_ dat zaec dat jan h_en martijns soen of zijn borghen voern_ namaels tot enigher tijt der ponten of der verbanden braken . des god verbieden moet . dat waer op hoer lijf . En_ des soe zoude jan h_en martijns soen vors_ een onversoent man wesen en_ bliue_ in allen manieren of hi van + den dootslaghe en_ ongheual vors_ verwonne_ waer tot dordr_ met allen recht . Jtem soe zal jan h_en martijns soen sijns ghelts wt~reyken en_ betalen ses hondert pont holl_s payments als binne_ dordr_ ghenghe en_ gaue is . die een helfte binnen die vier heylich daghen van korssauont naest comende . En_ die ander helfte binne_ die vier heylich daghen van paesschen daer naest comende op een peyne van tween dusent pont holl_s payments vors_ . Des soe zijn borghe dit voornoemde ghelt te betalen op al zulke daghen als voers_ staet met ghesamender + hant en_ onghesceyden op die peyne vorn_ . Eerst van jan h_en martijns soens vaders maghen . damaes die hont heynrix soen . cleys buweel h_en cleys soen . jan van + der sluus en_ dirc kriec jans soen . van sijnre moeder maghen . harman haec pieters soen tielman haec sijn broeder harman haec jacobs soen en_ heynric feytop hughen . Jtem soe sal jan h_en martijns soen vors_ van + der vors_ zoe_ne brieue gheue_ bezeghelt onder sine_ zeghel . Jn~houdende van woerde te woerde van allen verbanden en_ ponte_ soe vors_ staet . Een yghelic ghilde in dordr_ die + se hebben willen . En_ des ghelijcs den vrienden van + der doder~hant . En_ dese voerscr_ zoe_ne was gheseit en_ gheslote_ opter zalen bi + den alinghe gherechte en_ den achten . En_ bi + den achtien p_sonen die daer toe gheuoecht en_ gheordineert waren soe vorscr_ staet . Jnt jaer ons h_en M˚ vier + hondert op sinte bauen auont . Des soe sal jan h_en martijns soen een maent lanc opten kerchof of in een cloester legghe in dordr_ na + den dach dat hi van + den steen gaet . En_ want ic jan h_en martijns soen vorscr_ alle verbanden en_ ponten soe vors_ staet verwilcoert hebbe te houden en_ te doen houden vor scepene_ als ghijsbrecht vrancken soen heynric otten soen van malborch . wormbout van + den wijngaerde he?ichmans soen En_ gillis van + der halle jans soen Soe heb ic mine_ zeghel Jn ke_nisse d_ w_heit hier an ghehanghen . Ghegheue_ int jaer en_ opten dach vorscreuen