Corpus Van Reenen-Mulder (CRM14): Oorkonde K094p40003

DIt is zulke zoene Ende zegghen als dat alinghe gherecht in dordr_ Metten achtien personen die + se op die tijt toe gheordineert ende gheuoecht waren van + der stede weghen vors_ van + der ghemeenten weghen Ende van jacops van kuunre ende tielman baernts soens weghen Om ghemeen profijt ende orbaer der stede vorsc_ Ende hebben aen~ghesien den groten last van beyden pertyen die tot deser tijt in + der stede is Om die te beuellen ende alle zaken daer of ten besten te keren Ende om te verhoeden alle arch datter namaels wt spruten mocht als van + den ongheual ende dootslaghe die ghesciet is an tween eerbaren persone_ . Ghijsbrecht van kuunre ghijsbrechts soen ende wiggher baernts soen dien god ghenadich sy Eendrachtelic ende minlic daer of een alinghe vaste zoene ghezeit ende gheordineert Bi consente den ghemene_ neringhen in dordr_ Ende bi consente alle ghijsbrechts van kuunre ende wiggher baernts soens maghen Des so sal claes moelnaer jans soen Ende sijn maghen tot ewighen daghen versoende lude wesen als van + den ongheual ende dootslaghe voersc_ jn sulken manieren ende vorwaerden so hier + na ghescreuen staet Jn + den Eersten soe heeft hem cleys moelnaer vorscr_ verwilcoert vor scepene_ in dordr_ op sijn lijf nemmermeer in ghezworen recht te comen in + der stede vorscr_ als . scout borghemeyster . scepen . Raet achte noch deken noch in ghenen die_st die der stede vors_ roert jtem heeft ofstal ghedaen van allen den ghenen die van + den ongheual ende dootslaghe vors_ bezaect sijn iof bezaect zullen worden Ende nemmermeer in dier lude gheselscap te comen noch raet noch daet met hem te hebben in gheenre wijs dat den heer der stede der ghemeenten of die vriende van + der doder + hant teghens draecht jtem sal buten der stede van dordr_ vors_ wesen . acht jaer lanc naest~come_de Ende niet nare der stede vors_ comen dan die vryheit van sinte gheertruden~berghe strect Ende daren tenden durende also langhe alst den heer der stede der ghemeenten of die vriende van + der doder + hant ghenoecht Ende hier om niement mesdoen noch doen mesdoen in gheenre wijs dat den heer der stede der ghemeente_ ofte eenich van + den vrienden van + der doder + hant teghens draecht Ende des so sijn borghe van cleys moelnaers maghen dese vornoemde pointen ende verbanden te houden / ende te doen houden op hoer lijf Eerst aernt moelnaer cleys soen . Ewout cleys druuts soen . florens sijn broeder Ende heyn hughen soen die (onleesbaar) Jtem waert dat zake dat cleys moelnaer of sijn borghen vornoemt namaels tot eenigher tijt der soenen der pointen ofte eenich der verbanden braken des god verbieden moet dat waer op hoer lijf Ende des so soude cleys moelnaer vorsc_ een onverzoent man wesen ende bliue_ in alre manieren jof hi van + den ongheual ende dootslag_ vorsc_ verwonnen waer tot dordr_ met allen recht jtem voert so sal cleys moelnaer daer toe sijns ghelt wt~reyken hondert pont hollans payments als binne_ dordr_ ghenghe ende gaue is die een helft den heer ende der stede vors_ . ende die ander helft die vriende van + der doder + hant . Te betalen tot drien terminen dat eerste derdendeel tot onser vrouwen daghe ter lichtmisse naest~comende . dat ander derdendeel te haf meye daer naest comende Ende dat derde derdendeel te bamisse daer naest comende Borghe dit vornoemde ghelt te betale_ op die daghe so vorscr_ staet jacop lisse hermans soen van tolen . dirc moelnaer ghijsbrechts soen . jan moelnaer cleys druuts soen Ende jan van beueren jtem so sal cleys moelnaer vorsc_ van + der vorseider zoene brieue gheuen bezeghelt ? sinen zeghel . jn~houdende van woerde te woerde van allen verbande ende pointen so vorsc_ staet Een yghelyc ghilde in dordr_ die + se hebbe willen ende des~ghelijx die vriende van + der doder + hant Ende dese vorsc_ zoene was gheseit ende ghesloten bi + den alinghe gherecht vors_ jnt jaer ons he_en M˚ ende vier + hondert opten neghensten dach der maent van october dat was op sinte victoers auond . Ende want jc cleys moelnaer vorsc_ alle vorbande ende pointen soe vorsc_ staet verwilcoert hebbe te houden ende te doen houden vor scepene_ als wouter van ghend_en wouters soen jan maleghijs h_en willem dukinx soen . willem dukinc h_en cleys oems soen Ende jan van haerssen heinrix soen So hebbe ic minen zeghel in kennessen der waerheit ? aen ghehanghen .