Corpus Van Reenen-Mulder (CRM14): Oorkonde K099p32401

Wij Florens van Dalem ende Arnt Arnt Cappen + soen scepen in Gorinchem orconden dat voer ons quam Tomis die Lumbaert ende gaf Mase den Hantscomaker tot enen rechten erfthijnse ene huys ende hofstat dat wilneer was Jan Saksens alst staende ende gheleghen is over die haven tusschen Arnts erve van der Brugghe aen deen side ende den Wier aen dander side om vier pont sjaers enen goden groten coninx + tornoysen voer sestien penninghe of payment dat so goet is te betalen jaerlijx ewelijc op Sunte Baven + dach of binnen twee weken jaerlijx daer + na onbegrepen . Waer hi des niet en dede noch sijn erfnamen so en hadden sie niet meer te segghen aen tvoerseyde huis ende erve ende so mach Tomis sinen vrijen wille daer + mede doen ende sijn nacomelinghe onverseghet van yemen . In kennissen ghegheven int jaer ons Heren dertien hondert ende vier + en + twintich op Sunte Lucas + dach ewangeliste .