Corpus Van Reenen-Mulder (CRM14): Oorkonde K102p31701

Wi peter lens / en_ gheraet haec scepen tot woudrich_ orconde_ en_ ke_nen met desen brieue beseghelt met onsen seghelen / dat voer ons quam alse voer scepen / ghese sgruters dochter / ghesons lijfs en_ machtich hare sinne / en_ scaut quite hare moeder van dien dedinghe / dat si hadde alse van der hantveste van der grute_ van woudrich_ / voert quam si voer ons scepen / en_ droech op / jan horen sone die grute met alle horen recht / en_ horen onrecht dat hore bestorue_ is va_ horen vader / en_ gontste hem der hantveste wale van der gruten va_ woudrich_ / die hi ghiede en_ liede dat hi hadde / en_ gaf hem dat vtescrift van der voerghenoemder hantveste / en_ verteech daer na op en_ verhalmeder na op / alse tot jans behoef voerseeght / hier ouer waren alse manne des heren van den lande / jan vten campe / en_ jan vriens sone / en_ willem va_ scrine / ghegheuen jnt jaer ons heren / Dusent / + Drie + hondert / + en_ seuentien / des manendaechs na sinte peters en_ sinte pauwels dach