Corpus Van Reenen-Mulder (CRM14): Oorkonde K135p34501

WJ pouwels die smid en_ huge gheraets soen Scepen in huesden tughen onder onse segele dat heine die jonge van herpt opdroech heinma_ne van hedichusen twee hont lants ligghende inden ba_ne van herpt op die oyslaghen tuschen heinma_ne voerseegt en_ ghodekens zadelmakers erfgename_ vanden bossche met derd + aluen voet dijx ligghende aen den cleyne_ molenwerf tuschen hube jans soen en_ jan wellen va_ herpt met sloot en_ met weteringe diere metten recht toe horen op dese voerscreue_ twee hont lants heeft verteghen heine die jonge tot heinmans behoef van hedichusen als hem en + gheen recht daer aen te behouden En_ heine die jonge voerseegt gheloefde heinma_ne voerseegt dese twee hont lants die voerscreue_ siin te waren Jaer en_ dach als een eyghen erue en_ een volboden en_ alle voerco_mer af te doen die daer op is of come_ mocht van sir weghen dien hi metten recht sculdich is af te doen Ghegeue_ int jaer ons h_en dertien + hondert en_ vijf en_ veertich sdonresdaghes na alre heyleghen dach .