Corpus Van Reenen-Mulder (CRM14): Oorkonde K141p30401

Wi Peter die Gruter , Niclaus voren Heylen sone ende Tiberis Jans sone , Johan die Blonde , Arnout die Rouer ende Wicher , scepen in Walewijc , maken kont eghelicken di dese litteren horen lesen dat wi waren ten horen ende ten syene dare vore Lumode Henrikes wif van Hesselare gaf horen sone Peteren ende opdroghe ene half virtel lans die leghet op oester~side van horen lande tote Wallewijc van der straten tote Camslote ende weder in op die wester~ziede , ont dats was wif marghen ghemeten , die dese voregheseghede vor Lutmode opdrogh die hove ende af~ghinc als~so als recgh was vore die hof ende vore die late tote des voregheseghede Peters bof hors sones ende al also als recgh was . Doe dit was voldane met desen voreghesede recgh ende Peter dit erve hadde , doe vercoft hiet Povels Arnouut sone van Bardewijc ende hoveden in desen voreghesegheden erve vore desen voreghesegheden hof ende vore die late ende dare op verteghe met vonnes tote Povels bove als soe als recgh was . Die ander half virtel , die leghet op die wester~siede van dare die voreghesegheden vif margen keerden tote dire mere , die gaf dese voregheseghede vore Luttmode haren voreghesegheden sone Peters en in desen voreghesegheden recghte dare si hem die vif marghen in gaf ende ghinch dare af hor lifthoech ende verteghe tote Peters bove hore voregheseghet sones van alle desen voreghesegheden erve vore desen voreghesegheden hoff ende met vonnes dere late ende al als so als recgh was . Doe dese voregheseghede Peter dit voreghesede erve hadde , doe vercoft hijt desen voregheseghede Pouels dese half virtel lans op de wester~siede van dare die vif marghen keert toter mere toe also als si dare gheleghen es , dare hevet hien in ghehovet met vonnes dire late ende op verteghen tote Povels bofve ende vore ons ende al als so als recgh was ende met die sinse al mien dien hove van Beke gheldet , al des voregheseghedes erves sal dese voregheseghede Peter sin ene vast ware desen voreghesegheden Povels evleken van sinen erfghenamen ende zonder commer . Vordane so hevet dese voregheseghede Povels desen voreghesegheden Peteren ghegheven dese voregheseghede half virtel lans van dare die voreghesegheden vif marghen lans keren toter mere toe in ene erfsins elchs jares omme drie pont svartter tornoyser ende die goet ende gheve ende altoes op zenten Martens dach te ghelden die in die wynter leghet . Van desen vore~ghesegheden vif marghen sal dese vore~gheseghede Povels ghelden die heren dien canoniken van Beken enen erfsins drie peninchghe jaers . Dese litteren waren ghegheven dinsdaghes vore zente Povels dach , in jare ons Heren derttin + honder jare ende drie . In orkonde derre wareheyth hebbe wi ons seghel hire ane ghehancghen . Boven scrift love wi : siede~mere .