Corpus Van Reenen-Mulder (CRM14): Oorkonde K141p30801

Dat si oppenbare allen den ghenen die dese letteren sien selen ocht horen dat quam Jan Jans sone her Heine sone was vore Clause ver Heilen sone ende Pietere den Grutere , scepene van Waelwijc , ende vercochte Aliten Jans Blonden dochter van dien vijr gherden lants die ligghen naest Berijs erve , die Jan her Heinen sone achter hem liet , tue gherden die weestwert gelegen sijn tuschen de Mere ende de Mase . Van desen tue gherden lants geloefde dese voregesede Jan derre vorgenuemder Aliten af te doene al vorcommer ende naerscap ende toesegghen ende euwelike te waerne op sijn goet dat hi heet ende vercrighen sal ende ervese in dit goet met wijsdome der scepenen ende met allen lants rechte . Doe dit gedaen was , quam dese vorgesede Alijt met haren montbore ende gaf dese vorgenuemden Janne ende Arnoude Oeldekene sijnen bruder dese tue gherden lants tenen ervelecke pachte omme tue mudde rogs jaers op sinte Andrijs dach gelevert op dat goet metter maten van Waelwijc , bi selker vorwarden ware dat si den pacht nien gouden op sinte Andrijs dach , dat si dat erve rumen souden . Vort geloefde hen Alijt met haren montbore , wart dat si hare cochten tue mudde rogs op tue gherden lants die also goet waren binnen der vriheit van Waelwijc , dat si die andre tue quite scelden soude . In orkenscap derre waerheit soe hebbe wi Claus ver Heillen sone ende Pieter der Gruter , scepenen van Waelwijc die vorgenuemt sijn , onse segele ane dese letteren gedaen . Int jaer ons Heren doe men screef dusentech dri + hondert ende achte , in sinte Margriten daghe .