Corpus Van Reenen-Mulder (CRM14): Oorkonde K141p30802

Dat si condech ende oppenbaer allen den ghenen die desen brief sien selen ocht horen dat quam Berijs Jan Heins sone in + de jeghewerdecheit Claus ver heilen sone ende Pieters tGruters , scepenen van Waelwijc , ende droech op Janne sinen sone ende Helsbenen sire dochter ende haren montbore tue gherden lants die gelegen sijn op oeester~side van + der vijft + alver gherden lants daer hi op seet . Doe hi hen de tue gherden lants hadde op~gedraghen bi wijsdoeme der scepene ende na den lants rechte , doe geloefde hi hen dat hi nemmermeer pinen en soude te comene weder te sire tocht . Doe dese vor~genuemde Jan ende Heelsbeen die erve hadden also vaste als de scepenen seiden dat hen gnoech ware , doe quamen si vore de scepenen ende droeghen op dit vorgenuemde erve Aliten Jan Blonden dochter ende ervedens daer in met wijsdoeme der scepenen ende met allen den lants rechte ende geloefden hare alle voercommer ende naerscap ende toesegghen af te doene . Voert geloefden si dat Pietere haren bruder , wanneer dat hi muddec waere , op dese tue gherden lants souden doen vertien ende dat si Aliten dese tue gherden lants euwelike waren souden op hare goet dat si hebben ocht vercrighen souden ongesceiden als saecweldeghe . Doe dit gesciet was , doe gaf dese vorgesede Alijt den vorgenuemden Janne ende Elsbeenen ende haren montbore dese tue gherden lants also alse geleghen sijn tuschen de Mere ende de Mase tenen erfelecken pachte omme tue mudde rogs jaerlecs , gelevert op den goede metter maten van Waelwijc op sint Andrijs dach , bi selker vortwarden , wart dat si desen pacht op den vorgenuemden dach nien gouden , dat si derve rumen souden . Vort gelovede Alijt ende hare montbore desen vorgenuemden Janne ende Eelsbenen ende haren montbore , wart dat si hare cochten tue mudde rogs op tue gherden lants die also goet ware binnen der vriheit vant Waelwijc , dat si die vorgenuemde erve soude quite scelden . Int orkenscap derre wareit soe hebbe wi Claus ver Heilen sone , Pieter de Grutere , scepenen van Waelwijc die voregenuemt sijn , onse segele aen desen brief gedaen . Dit gescide int jaer ons Heren doe men screef dusentech dri + hondert ende achte , op sinte Margriten dach .