Corpus Van Reenen-Mulder (CRM14): Oorkonde K150p34801

Wi Schepenen Ghesuoren Rentmeestren Dekenen van den ambachten en_ een deel der goeder Cnape_ der stat van tshertoghen~bossche Doen Cond allen den ghenen die dese tieghenwerdighe lettren soelen zien ocht horen lezen Dat wi in name ende van weghen der voerseider stat ghegeue_ hebben ende gheuen Goeswijn Steenwech onsen mede~poerter een ledich stat van ene_ vake gheleghen op tghewanthuus in die stat van + den bossche voerghenoemt opt dende tot Ghibe lyssens waert aen die side ten Raethuyse waert / voer die tsijnse die onse here die hertoghe van brabant daer jaerlics aen heuet Ende voer twe ende dartich scillinghe payements als voer den tijt der gulden des ghelts in tsertoghenbossche te boersen ghemeinlike gaen sal te ghelden alle jaer der voerseider stat / van + den voerghenoemden Gosswijn erflike_ die een helft in den hoeghtide der gheboerten ons heren en_ die ander helft in den hoeghtide der gheboerten sente jans baptiste Ende ghelouen dat wi den voerghenoemde_ gosswijn van + der voerghenoemder ledigher stat van enen vake / hem te tsijnse ghegheuen als voer + gheseecht is gherecht ende Sculdighe waerscap soelen doen / ende alle commer die daer in weer vutghenome_ den tsijnsen voerghenoemt altemael af soelen doen met alsulker voerwaerden so wanneer die stat voerghenoemt dese ledighe stat va_ den vake voerghenoemt weder hebben wille hoeren oerbaer mede te doene ende enghene kast daer in te setten so soelen wi Gosswine voerghenoemt gheuen twe en_ dertich pont en_ vijf scillinghe payements / en_ dan sal gosswijn voerghenoemt sine_ kast weder na hem nemen ende hier mede sal die voerghenoemde stat van den voerscreuenen voerwaerden te~mael quijt Syn ende ontbonden sijn jn Orcondscap welker dinc wi desen brief metten groten zeghele der stat voerghenoemt hebben bezeghelt ghegheuen des dijnsdaghes na den daghe sente bartholomeus apostel jnt jaer ons heren M˚ CCC˚ / + ende acht ende veertich . .