Corpus Van Reenen-Mulder (CRM14): Oorkonde K150p35202

Wij scepen_ . . gheswoerne Rentmeyst_en . . dekene van den ambachten een deel der goeder knapen en_ die ghemeyne stat van Shertoghenbossche maken cond allen den ghenen die dese lett_en soelen sien of horen lesen dat wi van weghen en_ in Name der voers_ stat wittelec en_ Erfliken vercoft hebben voer een vri eighen erue Didderic boc . een gheerken / viere hont en_ viue en_ neghentich Roeden begripende gheleghen after dat muntelken aen deen zide . ende tusschen den Eyndhoutschen dike van der ander zide binnen den tween diepen die al~daer wesende sijn . Van den voerghenoemden didderic coper in een erfrecht te besitten en_ te hebben en_ dit voers_ gheerken van viere hont / ende viue en_ neghentich Roeden hebben wi van der voers_ stat weghen den seluen didderic coper op~ghedraghen en_ daer op verteghen alse in Eighenen goede ghewoenlec es te ghesciene . Ende hebben gheloeft ende ghelouen van der voers_ stat weghen dat wij den voergh_ didderic coper gherecht ende sculdighen waerscap soelen doen alse van enen vri eighenen erue / jn alsoelker voerwaerden dat dese voers_ didderic coper / dat voerghenoemde gheerken viere hont en_ viue en_ neghentich Roeden begripende nieman vercopen en sal noch vercopen en sal moghen noch aen nieman vervreemden noch vervreemden en sal moghen dan sinen medepoerteren in der stat van den bossche voerghenoemt jn orconscap van welker dingh en_ in kennissen der wareit hebben wi den ghemeinen zeghel der voernoemder stat van den bossche . aen dese lett_en doen hanghen . Ghegheuen jnt jaer ons heren Dusent drie + hondert vijftech ende twe des maendaeghs na ascensien dach . .