Corpus Van Reenen-Mulder (CRM14): Oorkonde K150p35501

Wij Scepen_ . . Gheswoerne Rentmeyst_en Dekene van den ambachten Een deel der goeder knapen Ende die ghemeyn stat van shertoghenbossche Maken cond alle_ den ghenen die dese litt_en sullen sien oft horen lesen dat wi van weghen ende in name der voers_ stat wittelec ende Erfelec vercoft hebben Goden duncop an die tymmerman die plaetmaker heylwighen wijf was henric bauderics Ende boden van tiel Een halue muer ? an + der muren der voers_ stat van buten drie ende neghentich voet begripende in lengden staende after den Erue der voers_ Cop_en die gheleghen sijn in die straet van den voers_ Cop_en in een Erfrecht te besittene ende te hebbene Ende hebben gheloeft ende ghelouen van der voers_ stat weghen dat wij den voers_ cop_en van desen voers_ haluer muren he_ vercoft alst voers_ is gherecht ende sculdighen waerscap sullen doen jn alsulker voerwarden dat men dat ghelt dat hier af comen sal belegghe_ Ende keren sal in orbere ende profijt der voers_ stat Dats te wete_ in vestinghe_ ende in muren wants die voers_ stat wael te doen heeft jn orcondscap van welker dingh ende in kennisse der waerheit hebben wij den ghemeyne_ zeghel der voers_ stat van tshertogenbosch aen dese litt_e doen hanghen Ghegheuen jnt jaer ons heren Dusent drie + hondert vijftech ende viue op sente peters dach ten stoel die men heyt ad Cathedram