Corpus Van Reenen-Mulder (CRM14): Oorkonde K150p35702

Wij . . Scepen_ . . Gheswoerne . . Rentmeyst_en . . dekene van + den ambachten Een deel der goeder knapen Ende die ghemeyn stat va_ ?shertoeghenbossche Maken cond allen den ghenen die dese letteren soelen sien oft horen lesen / dat wi van weghen ende in name der voers_ stat wittelec en_ erfelec vercoft hebben jacob ludings soen ende sijnre suster Een erue / drie ende twentich voet ende enen haluen voet in breyden begripende gheleghen after haer huys ende erue dat gheleghen is aen die merct buten der auder muren der voers_ stat / streckende van der voers_ muren totten stilen toe die daer staen in den stroem / van den voerg_ jacob en_ sijnre suster jn enen erfrecht te besittene en_ te hebbene Ende dit voers_ erue hebben wij den voers_ jacob en_ sijnre suster cop_en van der voers_ stat weghen op~ghedraghen en_ daer op verteghen alse in soelken goeden ghewoenlec is te ghesciene Ende hebben gheloeft ende gheloeuen van der voers_ stat weghen dat wij den voers_ jacob en_ sijnre suster cop_en van desen voers_ Erue / gherecht en_ sculdich waerscap soelen doen Ende allen voerco_mer af~doen soelen den seluen wtghenomen ?shertoeghen tijns die men daer met den Recht sculdich is vte te gheldene / jn alsulker vorwarden dat dese voers_ jacob en_ sijne suster enen goeden steynen werf sullen doen legghen after dit voers_ erue daer die stilen staen binnen twe jaren na den daete der tieghenwordighen letteren volghende sonder middelt Ende dese voers_ jacob en_ sijn suster coep_e soelen ene brugghe moeghen legghen oft doen maken o?er desen voers_ stroem soe wannere si willen jn Orcondscap van welker ding En_ in kennissen der waerheyt soe hebben wij den ghemeynen zeghel der voers_ stat van den bossche aen dese lett_en doen hanghen Ghegheuen jnt jaer ons heren Dusent Drie + hondert Vijftich en_ seuene Des maendaghes na der Octauen des heylichs Sacraments dach . -