Corpus Van Reenen-Mulder (CRM14): Oorkonde K150p39101

Wij Scepen_ gheswoerne Rentmeist_en dekene van + den ambachten een deel der goeder knapen Ende alle die ghemeyn stadt van shertogen~bossche doen condt allen luden dat wij van weghen en_ in name onser voers_ stat Ende daer in aen~ghesien grote_ orbaer en_ profijt en_ nutscap der seluer onser stat voirs_ bestaet en_ ghegeue_ hebben Otten bruyscens den dijcke hier na bescreue_ ons_ voers_ stat toe~behore_de van + den selue_ Otten ewelijc te maken te diken en_ in goeden gereke te houden dats te weten dien dijcke die ghelegen is tusschen die valpoert der voers_ stat en_ tusschen hijntham en_ welc dijcke begint aen die valbrugge ghelegen bij die valpoert voers_ en_ streckt (onleesbaar) van~daer tot den huyse toe gerijts van gessen gelegen tot hijntham welc dijcke voers_ sal hebben die hoeghede en_ sijn ewelijc alsoe hoghe al ouver al / als is dat ouerste van + den steynen ghewolften der steynen brugghen die staen en_ ghelegen sijn in den dijcke voers_ Ende welke dijcke voers_ sal sijn breet ewelijc al ouver al een en veertich hamer~voet vytgenome_ een deel des voers_ dijcs dat gelege_ is tusschen die voers_ valbrugge en_ tusschen dander holten brugge daer bij staende welke deel dijcs (onleesbaar) (onleesbaar) sal altoes sijn ouver al vier en dertich hamer~voet breet Ende om desen voers_ dijcke ewelijc aldus te houden en_ te dijken en_ te bewaren als voers_ is Soe hebben wij gegheuen erfelijc en_ geuen den voers_ otten die erven hier na bescreuen dats te weten een erve gelegen tusschen een ghedeelt des voers_ dijcs gelege_ + bij die holten brugge voers_ en_ tusschen den graue behorende tot den erve wilne_e joffrou agnesen ? risingen Ende dat erve dat ghelege_ is ouver die verste steyne_ brugge staende jn den voers_ dijcke tusschen de_ voers_ dijcke die ghelege_ ou_ die verste steynen brugge en_ tusschen den graue aldaer van pijnappels~camp / Ende dat erve daer voer liggende teynden pijnappels~camp / streckende van + den kant van + den graue van pijnappels~camp dats te wetene van dien kant des selfs grave die gelegen is ter ?donc waert ? recht tot den molen~werf toe behorende tot ghiben pels op die een side en_ tusschen den voers_ dijcke aldaer op die ander side Ende dat erve dat ghelege_ is aen de_ voers_ dijcke dats te weten ander sijden des selfs dijcke ter ortenre porten waert streckende van + der voers_ valbruggen tot der zieker herken toe / dat staende is bij die moelen wiln_e dircs van andel Ende een ken erfs gelegen bij der voers_ moelen des voers_ wiln_e dircs van andel gelijc en_ in alre manieren dat die voers_ erven daer ghelegen sijn en_ onser voers_ stat toe~behoren behoudelijc altoes hier in allen den (onleesbaar) staende aen beyden zijden des voers_ dijcks horen werven horen gronden horen vvegen en_ allen horen rechten en_ toe~behoerten ghelijc sij die hebben jn der teghenwoerdicheit en_ oec heerbracht en_ gehadt + hebben Met voerwaerden dat onse voers_ stat ewelijc houden sal en_ sculdich sal sijn te houden in goede_ ghereke die twee steynen brugge_ die staende sijn in + den voers_ dijcke met hoeren steynen wanghen Ende oec die voers_ valbrugge en_ oec die andere holten bruggen ouer die selue valbrugge staende met hoeren hoefden en_ vvangen van hout en_ elc wanghe van + der voers_ valbruggen en_ van der andere holtenne brugge_ voers_ sal zijn lanc op elc sijde van + den seluen twee holte_ne brugge_ tien hamer~voet Ende voer den voers_ dijcke in alder manieren en_ vormen te houden te maken en_ te dijcken tot ewe?ken daghen als voers_ is / Soe hebben wij gheloeft en_ ghelouen in goeden trouwen te geuen en_ te ghelden den voers_ Otten eenen jaerliken en_ erfs tijns van twee en dertich ouden scilden goet van goude en_ gherecht van ghewicht of ander payment van + der seluer weerden elcs siaers erfelijc / die een helft op den sonnendach na sente remeys dach ende die ander helft op den sonnendach na den hoechtijt van paesschen Ende die ierste termine der gulden daer af sal sijn des sonnendachs na sente Remeys dach naest comende Ende om den voers_ dijcke tot ewighen tijden loflijc en_ vvael te houden en_ te maken in alre hoegeden ende breyden voers_ En_ in alre manieren voers_ Soe heeft (onleesbaar) weder verbonden die voers_ Otte sijn huys en_ erve ghelegen in onser voers_ stat ouer die swenghelbrugge tusschen den erve wiln_e jans andries soen aen die een sijde en_ tusschen den erve willems van + den erenuest aen die ander zijde Ende alle en_ een yegelijc andere goede des selfs otten die hij nv heeft en_ namaels vercrighen sal soe waer sij gheleghen sijn Ende die voers_ otte heeft ons gheloeft als een principael zaec~wout op die verbijndenisse sijns huys ende erfs voers_ Ende voert op sijn lijf en_ op alle sijn goede die hij heeft of vercrighen sal en_ hebben sal So waer sij gheleghen sijn of wesende dat hij den voers_ dijcke ewelijc houden sal en_ dijcken en_ maken sal in alder hogeden ende breyden voers_ En_ in allen manieren en_ vormen als voers_ is Oec eest voerwaerde en_ besprecke dat otte voers_ aen desen dijcke en_ op die voers_ erven die wij hem aldus ghegeue_ hebben tot den voers_ dijcke te houden als voers_ is nu_merm__e en~gheen boemen gesetten en sal noch ghetelen dan ghehoetde wilghen welc wilgen in redeliker hogeden en_ lengden ghehoet zullen sijn Oec eest voerwaerde dat dese voers_ dijcke ewelijc sal sijn en_ bliuen ligghen ghemeyn alle en_ een yegeliken luden die nv sijn en_ naemaels sijn sullen ouer te gaen en_ te keren en_ te baren en_ te driuen en_ te bruyken en_ te besighen in alre manieren ghelijc hij leeget in der teghenwerdicheit Jn ke_nissen der waerheyt soe hebben wij den grooten ghemeynen zeghel onser voers_ stadt aen desen brief doen hanghen Gegheuen des vridachs na den sonnendach als + men singt judica jnt jaer ons he_en dusent drie + hondert een + ende tneghentich