Corpus Van Reenen-Mulder (CRM14): Oorkonde K160p30801

Allen den ghenen die desen brief seelen sien oft horen lesen , wy scoutait , scepene , raet ende die ghemeyne porte van Breda , saluut ende kinnisse der warheit . Wy doen u te + weten ende orconden med desen brieve , dat wy overmids ghemeyne orbore dat dar ane ghelach hebben ghesceden tconvent van den nonnen van Breda van den gasthuse van Breda , in derre maniren dat dese vorseide nonnen soelen hebben enen weech gaende neffens den veistgraft , twentech voet wyt van den veistgrafte , of dar bi . Vort~ane so moghen dese vorseide nonnen houden erflike ende ewelike sonder enech weder~seggen op die gemeynt van Breda acht coye , acht verken ende vire perde . Vort ane die vive ende dertech scellinge swarte tornoyse die dese vorseide nonnen hadden gheloeft desen vorseiden gasthuse van dien bossce ende van den beemde die bi hem ghelegen syn , die hebben sie wittelike ende redelike af~ghecoft omme ene somme van penningen die desen vorseiden gasthuse ghehelike vergouden es . Ende hiir mede sal wesen goed pays ende goede vrinscap tusscen die nonnen ende gasthuus voer~ghenoemt , ende gasthuus ghesceden van den nonnen ende die nonnen weder van den gasthuse . In kennissen der warheit es dese brief bezegelt med onser ghemeenre porte zegele van Breda . Gegeven int jar ons Heren M . + CCC . + ende achte , des manendages na beloken paesscen .