Corpus Van Reenen-Mulder (CRM14): Oorkonde K160p30803

Wij henric sterko en_ willem Sluse scepe_ne i_ breda . Orconden med desen letteren dat voer ons quam diederic die bonte en_ machtelt sijn zuster en_ machtelt sire zuster iden dochter med haren montboren / en_ iffenden onderlinge van dien versterfte / dat hem verstoruen was van harre moeder / en_ harre oudermoeder dode / en_ med deser (onleesbaar) verteech elker manlic op andren metten vo_nisse / en_ med den rechte / vort~ane alsoelke delinge van dier erfnissen als machtelden harre niften harre zuster iden rechtes behoerde / war dat si gheleghen was binne_ breda / oft buten breda / die gaf si med haren montbore haren oem diederike voergenoemt tene_ rechten erfcijnse omme virtech scellinghe / ene_ ouden coni_cs tornoysen gherekent o?er zeestijn pe_ni_ge / oft payment dat goed iegen is / te ghelden altoes deser vorseider machtelden / of den ghene_ die houder es van desen brieue / op sente mertens dach in den wijnter / war oke / dat sake dat dese vorseide machtelt storue / dat diederic vorgenoemt noch machteld (onleesbaar) moye negheen recht ane desen vorseiden cijnse / mochten hebben / oft behouden / En_ dar hebben si op verteghen / also als vo_nisse wisede / en_ recht was / . vortane eist vorwarde war dat sake / dat diederic voergenoemt / cofte virtech scellinge jarlic cijns / payments voerghenoemt binne_ heiden / oft buten heiden / op een pant dat die scepe_ne / oft die manne seiden / en_ priseden / dat goed genoch ware tote machtelden behoef / of des gheens die houder es van desen brieue / so sal diederix bonten pant quite / en_ vri sijn van desen vorseiden cijnse . Jn kinnissen der warheit es dese brief bezegelt med onsen zegelen / jnt jaer ons h_en . M . + ccc . + en_ achte ?es vriendages / na sente seruaes dach . -