Corpus Van Reenen-Mulder (CRM14): Oorkonde K160p34401

Wi willem leinsen sone en_ aernoud die g_we scepenne jn breda / Orconden en_ kennen med desen brieue dat voer ons quamen onser vrouwen broeders van markendale / dats te + weten / jan van den houte / jan haec / laurens vand_ brugghen / heine brugghe arnoud bellaerts sone / en_ ander brueder van markendale dies machtech waren op dene side / en_ die ghene die goed hebben ligghen after markendale / dat es te weten / willem van der brugghen / aernoud beuer / yde wouter lotijns / jan heelt / willem bolle / willem reyners sone / peter van den water die smit / wout_ crabbout / jan coman / mathijs van den water / ghibel van der brugghen / boudewijn van helsdonc / en_ diederic fyen sone op dander side / en_ droeghen ouer~ene ere wisselinghen in derre manieren dat onse vrouwe van markendale sal hebben ende behouden dien wech die after markendale ghinc tote dien goede dat daer after gheleghen es / en_ daer haren orboer mede doen / . en_ willem van der brugghen ende sine_ ghesellen voernoemt die daer after gheleghen sijn die sullen voertmeer weghen doer dat veken ouer onser vrouwen goed van markendale tote haren goede toe / ten corsten velde / en_ ter minster scaden / en_ varen en_ keren si en_ hare nacomelinghen onverseghet alsi willen en_ . Ende begaren omme~dat dese wisselinghe vaste en_ ghestade sal bliuen tote eweliken daghen / . en_ omme beden wille van den partien voerseit / so hebben wi desen brief bezeghelt med onsen zeghellen . jnt jaer ons h_en . M . + CCC . + viertech en_ viere jn sente peters en_ sente pauwels daghe binnen wedemaent . -