Corpus Van Reenen-Mulder (CRM14): Oorkonde K160p35701

Wy Willem Leinsens sone ende Gheraert die Bonte , scepenen in Breda , orconden ende kennen med desen brieve , dat voer ons quam Jan Tierloet ende verlyde dat hi sculdich ware minre~vrouwe Kathelinen van + der Cameren , priorinne van + den nonnen van Breda , ende joncfrouwe Margriten van Ykel , des si welneer brieve hadden , die nu verbrant syn , alsi ons zegghen , twe scellinghe oude groote tornoyse tsjaers erfcyns oft die weerde daer ieghens , in anderen goeden paymente , op dat huus ende op die drie cameren med haren toebehoerten , die welneer waren heren Heinric Snellaerts ende gheleghen syn tusschen Jacob Crucken goet aen dene side ende Jan Kystricx aen dander side , altoes te gheldene desen erfchyns op sente Mertens dach in den winter , in der manieren , soe wanneer dat de eene sterft van hen beiden , dat dan dese cyns mede versterft op die ghene die daer te liven blijft ende soe wanneer si beiden van live ter doet comen syn , soo sal dese cyns comen ende versterven op hare godshuus altoes sonder arghelist . In orconden desen brieve bezeghelt met onsen zeghellen , int jaer ons Heren M . + CCC . + vyftech ende zeven , twelf daghe binnen Wedemaent .