Corpus Van Reenen-Mulder (CRM14): Oorkonde K160p35702

Wy Willem Leinsens sone + , Gheraerd die Bonte ende Jan Mathys , scepene in Breda ende late tsheren van Breda , orconden ende kennen med desen brieve dat voer ons quam Jan Tierloet ende verlyde dat hi sculdech ware minre~vrouwe Katelinen van + der Cameren , priorinne van + den nonnen van Breda en Joncfrouwe Margriten van Ykel , des si welneer brieve hadden , die nu verbrant syn alsi ons zegghen , drie scellinghe ende zesse penninghe ouder groten tornoyse tsjaers erfcyns , oft die weerde daer jeghens in anderen goede paymente , op drie boenre moers metten gronde gheleghen aen Wagenberch die welneer waren Willems van den Hove , tusschen der moinchen wech an dene side ende Aernds goet van Hosselt an dander side , altoes te gheldene desen chyns op sente Mertens dach in den winter , in der manieren soe wanneer dat dene sterft van hen beiden dat dan dese cyns mede versterft op die ghenen die daer te live blijft . Maer so wanneer si beide van live ter doet comen syn , so sal dese cyns comen ende versterven op hare godshuus altoes sonder arghelist . In orconde desen brieve bezeghelt met onsen zeghellen , int jaer ons Heren M . + CCC . + vyftech ende zeven , twelf daghe binnen Wedemaent .